Home   | Editorial   | Latest News   | Local News   | Kerala   | National   | International   | Business   | Sports   | Obituary   | NRI News   | Movies   | Health
May 30, 2020
 
 
    
 
Print this page
 

ജീവിതം എത്ര ദിവസംകൂടി?

ജീവിക്കുവാന്‍ ഒരു ദിവസം മാത്രമേ നമുക്കവശേഷിക്കുന്നുള്ളുവെന്നു കരുതുക. അങ്ങനെയൊരു സാഹചര്യത്തില്‍ നാം എന്തുചെയ്യും? ഈ ചോദ്യത്തിന് ഇന്റര്‍നെറ്റില്‍ കാണുവാനിടയായ രണ്ടു പേരുടെ ഉത്തരങ്ങള്‍ താഴെ കുറിക്കുന്നു:

''എല്ലാ സുഹൃത്തുക്കളെയും ക്ഷണിച്ചുവരുത്തി വലിയൊരു പാര്‍ട്ടി നടത്തി ആഘോഷിക്കും.''

''എനിക്കറിയാവുന്ന എല്ലാവരെയും വിളിച്ചുവരുത്തി ഞാനൊരു വലിയ ആഘോഷം നടത്തും.''

ജീവിതത്തെ ആഘോഷമായി കാണുന്നവര്‍ ധാരാളമുണ്ട്. അങ്ങനെയുള്ളവരുടെ ഗണത്തില്‍പ്പെടുന്നവരാണു മുകളില്‍ കൊടുത്തിരിക്കുന്ന ഉത്തരങ്ങള്‍ നല്‍കിയിരിക്കുന്നത്.

ജീവിതത്തെ ആഘോഷമായി കാണുന്നതില്‍ തെറ്റൊന്നുമില്ല. എന്നു മാത്രമല്ല, നമ്മുടെ ജീവിതത്തിലെ സുന്ദരനിമിഷങ്ങള്‍ ആഘോഷിക്കുകയും വേണം. എന്നാല്‍, ജീവിതം മുഴുവനും പാര്‍ട്ടി നടത്തി ആഘോഷിക്കുവാന്‍ മാത്രമുള്ളതാണെന്നു കരുതിയാലോ? എങ്കില്‍ ജീവിതത്തെക്കുറിച്ചു നമുക്കുള്ള വീക്ഷണം വികലമാണെന്നു വ്യക്തം.

'വണ്‍ മോര്‍ ഡേ ടു ലിവ്' എന്ന പേരില്‍ കാരള്‍ ആന്‍ എന്നൊരാള്‍ എഴുതിയിരിക്കുന്ന ഒരു കവിത ഇവിടെ പകര്‍ത്തട്ടെ:

''എനിക്ക് ഒരു ദിവസം മാത്രമേ ജീവിക്കുവാനുള്ളുവെങ്കില്‍ എല്ലാ സ്‌നേഹവും സ്തുതിയും ബഹുമാനവും ഞാന്‍ ദൈവത്തിനു നല്‍കും. മറ്റുള്ളവരുടെ മുഖത്ത് ഒരു പുഞ്ചിരി പടര്‍ത്തുവാന്‍ ഞാന്‍ പരമാവധി ശ്രമിക്കും; ദൈവമേ, അങ്ങയുടെ അനുഗ്രഹങ്ങള്‍ അവരുമായി പങ്കുവയ്ക്കുവാനും ഞാന്‍ ശ്രമിക്കും.

''സുഖത്തിലും ദുഃഖത്തിലും അങ്ങ് എന്നോടൊപ്പമുണ്ടായിരുന്ന നിമിഷങ്ങള്‍ ഞാന്‍ ഓര്‍മിക്കും; എനിക്കുവേണ്ടി അങ്ങു ചെയ്ത എല്ലാ കാര്യങ്ങള്‍ക്കും ഞാന്‍ നന്ദിപറയും; അങ്ങയെക്കൂടാതെ ഒരു വിജയവും എനിക്കു നേടുവാന്‍ സാധിക്കുമായിരുന്നില്ല.

''എനിക്ക് ഒരു ദിവസം മാത്രമേ ജീവിക്കുവാനുള്ളുവെങ്കില്‍ ഞാന്‍ കരയിപ്പിച്ച കുട്ടിയോടു ഞാന്‍ ക്ഷമചോദിക്കും. ഞാന്‍ മറ്റുള്ളവരോടു പറഞ്ഞ മുറിപ്പെടുത്തുന്ന വാക്കുകള്‍ തിരിച്ചെടുക്കും. എന്നിട്ടവരുടെ ഹൃദയം പൊട്ടിച്ചിരിയും തമാശയുംകൊണ്ടു നിറയ്ക്കും.

''എനിക്ക് ഒരു ദിവസം മാത്രമേ ജീവിക്കുവാനുള്ളുവെങ്കില്‍ ഞാന്‍ ആരെയും എന്നില്‍നിന്നകറ്റി മാറ്റില്ല; ഞാന്‍ ഒരാളെയും മുറിപ്പെടുത്തില്ല. കാരണം, ഞാന്‍ അവസാനം വരെ എല്ലാവരെയും സ്‌നേഹിക്കേണ്ടതല്ലേ?''

ഇത്രയും എഴുതിയിട്ടു കാരള്‍ ആന്‍ ചോദിക്കുകയാണ്: ''ഓരോ ദിവസവും നമ്മുടെ അവസാന ദിവസമാണെന്നു കരുതി എന്തുകൊണ്ടു നമുക്കു ജീവിച്ചുകൂടാ?''

നാമെല്ലാവരുടെയും വിചാരം നമുക്കിനിയും ധാരാളം ആയുസുണെ്ടന്നല്ലേ? ഇന്നോ നാളെയോ നാം മരിക്കുമെന്നു നമ്മിലാരെങ്കിലും കരുതുന്നുണ്ടാവുമോ? എന്നാല്‍, ദീര്‍ഘകാലം ജീവിച്ചിരിക്കുമെന്നു കരുതിയിരുന്നവരില്‍ എത്രയോ പേര്‍ ഇന്നു മരിക്കുന്നു! അപകടമോ രോഗമോ എന്തെങ്കിലുമാകാം അവരുടെ മരണത്തിനു കാരണം. പ്രതീക്ഷിച്ചിരിക്കാത്ത നേരത്തു മരണം അവരെ വിഴുങ്ങുന്നു .

മരണം എപ്പോള്‍ വേണമെങ്കിലും ആര്‍ക്കും സംഭവിക്കാം. പക്ഷേ, അതുകൊണ്ടു നാം ഭയപ്പെട്ടു കഴിയണമെന്ന് അര്‍ഥമില്ല. മരിക്കാന്‍ തയാറായിരിക്കുന്നതുപോലെ ജീവിക്കുക എന്നതാണു നാം ചെയ്യേണ്ടത്.

നാം നാളെ മരിക്കുമെന്ന് ഇന്നറിഞ്ഞാല്‍ നമ്മുടെ ജീവിതത്തിലെ സകല കാര്യങ്ങളും ഉള്ള സമയംകൊണ്ടു ശരിയാക്കാന്‍ ശ്രമിക്കില്ലേ? നമുക്കു ബാക്കിനില്‍ക്കുന്ന സമയം മുഴുവനും നന്മചെയ്യാനും തിന്മചെയ്യാതിരിക്കാനുമാവില്ലേ അപ്പോള്‍ നമ്മുടെ പരിശ്രമം?

ഒരു ദിവസംകൂടി മാത്രമേ ജീവിതമുള്ളു എന്നറിഞ്ഞാല്‍ നാം തെറ്റു ചെയ്തിട്ടുള്ളവരോടു ക്ഷമ ചോദിക്കുവാനും നമ്മോടു തെറ്റുചെയ്തിട്ടുള്ളവരോടു പൊറുക്കാനും നാം തയാറാവില്ലേ?

നമുക്ക് ഒരു ദിവസംകൂടി മാത്രമേ ബാക്കിയുള്ളുവെങ്കില്‍ ദൈവം തന്നിട്ടുള്ള എല്ലാ അനുഗ്രഹങ്ങള്‍ക്കും നന്ദി പറയുവാനും എല്ലാ തെറ്റുകള്‍ക്കും അവിടുത്തോടു മാപ്പുചോദിക്കുവാനും നാം തയാറാകില്ലേ?

ഒരു ദിവസംകൂടി മാത്രമേ ബാക്കിയുള്ളു എന്നറിയാമെങ്കില്‍ തീര്‍ച്ചയായും നമ്മുടെ ജീവിതം ഏറ്റവും കുറ്റമറ്റതാക്കുവാന്‍ നാം ശ്രമിക്കും. അപ്പോള്‍ കൊച്ചുകൊച്ചു കാര്യങ്ങളെക്കുറിച്ചു നാം അസ്വസ്ഥരാകുമോ? കൊച്ചുകൊച്ചു കാര്യങ്ങളെക്കുറിച്ചു നാം വാശിപിടിക്കുമോ? നിസാര കാര്യങ്ങളുടെ പേരില്‍ നാം വഴക്കിനു മുതിരുമോ?

ജീവിതത്തില്‍ നാം ചെയ്യുന്ന പല തെറ്റുകളുടെയും ഒരു കാരണം ആ തെറ്റുകള്‍ക്കെല്ലാം പിന്നീട് നമുക്കു പരിഹാരം ചെയ്യുവാന്‍ സാധിക്കും എന്ന മിഥ്യാധാരണയാണ്. എന്നാല്‍, ചെയ്യുന്ന തെറ്റുകളെല്ലാം തിരുത്തി അവയ്ക്കു പരിഹാരം ചെയ്തശേഷം മരിക്കുവാന്‍ സാധിക്കുന്നവരുടെ എണ്ണം എത്രയോ കുറച്ചുമാത്രം!

ആയുസിന്റെ ഹ്രസ്വതയെക്കുറിച്ചു നമുക്ക് അവബോധമുണെ്ടങ്കില്‍ നമ്മുടെ ജീവിതത്തിന്റെ മേന്മ ഉറപ്പുവരുത്തുവാന്‍ നാം ശ്രദ്ധിക്കുകതന്നെ ചെയ്യും. അതായത്, മരണത്തെ നമ്മുടെ കണ്‍മുന്നില്‍ കാണാനായാല്‍ ജീവിതത്തെക്കുറിച്ചു നമുക്കു വ്യത്യസ്തമായ ഒരു കാഴ്ചപ്പാട് ഉണ്ടാവുമെന്നു വ്യക്തം. മാത്രമല്ല, ആ വ്യത്യസ്തമായ കാഴ്ചപ്പാട് നമ്മുടെ ജീവിതത്തിന്റെ ഗുണമേന്മ വര്‍ധിപ്പിക്കുകയും ചെയ്യും.

നാം എന്നു മരിക്കുമെന്നു നമുക്കറിയില്ല. എന്നാല്‍, നാമെല്ലാം ഒരു ദിവസം മരിക്കുമെന്നറിയാം. നാം എന്നു മരിച്ചാലും എപ്പോള്‍ മരിച്ചാലും അതു ഭയപ്പെടുവാനുള്ള അവസരമായി മാറുകയില്ലെന്നു നമുക്ക് ഉറപ്പുവരുത്താം. അതിനുള്ള എളുപ്പവഴി നമ്മുടെ ജീവിതത്തിന്റെ ഗുണമേന്മ വര്‍ധിപ്പിക്കുകയാണ്.

 


 
    
 
To send your comments, please click here
 
 


Rashtra Deepika LTD
Copyright @ 2020 , Rashtra Deepika Ltd.