എളമരം ലാലയുടെ മൂത്ത ശിഷ്യന്മാർ ചേർന്നു അടുത്ത ദിവസങ്ങളിൽ കൊടികുത്തി പൂട്ടിച്ചതു രണ്ടു സ്ഥാപനങ്ങളാണ്. അതും ബാങ്കിൽനിന്നു വൻ തുക വായ്പയെടുത്തു തുടങ്ങിയ സ്ഥാപനങ്ങൾ. ഒരു സ്ഥാപനം തുറന്നു കൈ നീട്ടം പോലും ഇതുവരെ വിറ്റിട്ടില്ലത്രേ.
കാര്യങ്ങളുടെ കൊടി പാറുന്നത് ഇങ്ങനെയൊക്കെയാണെങ്കിലും ഈ സംസ്ഥാനത്തെ നമ്മൾതന്നെ വിളിക്കുന്നതു ‘വ്യവസായ സൗഹൃദ വിമൽകുമാർ’ എന്നാണ്. കൊടി കുത്തുന്നതും വടി കുത്തുന്നതുമൊക്കെ വെറും ഒറ്റപ്പെട്ട സംഭവങ്ങളാണെന്നാണ് നമ്മുടെ നേതാക്കളുടെ പക്ഷം. ‘ഒറ്റപ്പെട്ട’ എന്ന വാക്ക് ഇല്ലായിരുന്നെങ്കിൽ നമ്മുടെ നേതാക്കൾ കഷ്ടപ്പെട്ടു പോയേനെ.
അഞ്ഞൂറാമത്തെ സംഭവം നടക്കുന്പോഴും നമ്മുടെ നേതാക്കളോടു ചോദിച്ചാൽ അത് ഒറ്റപ്പെട്ട സംഭവം മാത്രമായിരിക്കും. എന്നാൽ, ഈ കാണുന്നതൊക്കെ തൊഴിലാളികളുടെ തൊഴിൽ സംരക്ഷിക്കാനുള്ള കലാപരിപാടികൾ മാത്രമാണെന്നാണ് സിഐടിയുക്കാരുടെ പക്ഷം. കൊടികുത്തി കട പൂട്ടിക്കുന്നതു തങ്ങളുടെ ലക്ഷ്യമല്ലത്രേ. അപ്പോൾ പിന്നെ തൊഴിലാളി സമരത്തിന്‍റെ പേരിൽ കടകളും കന്പനികളും പൂട്ടുന്നതോ? അതിപ്പം വാഴ നനയ്ക്കുന്പോൾ ചീരയും നനയും, സ്വാഭാവികം!
ബാങ്കിൽനിന്നു വായ്പയെടുത്തു ജീവിക്കാൻ എന്തെങ്കിലുമൊരു സംരംഭം തുടങ്ങുന്നവൻ പാർട്ടിക്കു മുന്നിൽ ബൂർഷ്വാ ആണെങ്കിലും പാർട്ടിക്കാർക്ക് ഇഷ്ടപ്പെട്ട മുതലുകളെയും മുതലാളിമാരെയും തൊട്ടുകളിക്കാൻ തൊഴിലാളി സഖാക്കൾ എന്നെങ്കിലും ഇറങ്ങിപ്പുറപ്പെട്ടിട്ടുണ്ടോ? അങ്ങനെയുള്ളവരെ കാണുന്പോൾ എന്താണെന്നറിയില്ല കുത്താൻ പൊക്കുന്ന കൊടി താനേ മടങ്ങും! ഇതൊരു രോഗമാണോ ഡോക്‌ടർ?
മിസ്ഡ് കോൾ ഛത്തീസ്ഗഢിൽ ചാണക വൈദ്യുത നിലയങ്ങൾ വരുന്നു.
- വാർത്ത
സംഘി കറന്‍റ്, ഞങ്ങൾ എതിർക്കും!
ഔട്ട് ഓഫ് റേഞ്ച്/ ജോണ്‍സണ്‍ പൂവന്തുരുത്ത്