അഭിനന്ദനെ സ്വീകരിക്കാനൊരുങ്ങി രാജ്യം; ബീറ്റിംഗ് റിട്രീറ്റ് ഇന്ത്യ റദ്ദാക്കി

അമൃത്സർ: അട്ടാരി-വാഗാ അതിർത്തിയിലെ പതാകതാഴ്ത്തല്‍ (ബീറ്റിംഗ് റിട്രീറ്റ്) ചടങ്ങ് ബിഎസ്എഫ് റദ്ദാക്കി. പാക് സേന പിടികൂടിയ ഇന്ത്യൻ വ്യോമസേനയിലെ വിംഗ് കമാൻഡർ അഭിനന്ദൻ വർധമാനെ കൈമാറുന്ന സാഹചര്യത്തിലാണ് തീരുമാനം. ഡെപ്യൂട്ടി കമ്മീഷണര്‍ ശിവ് ദുലര്‍ സിംഗാണ് ഇക്കാര്യം അറിയിച്ചത്. അന്താരാഷ്ട്ര ശ്രദ്ധ നേടാനുള്ള പാക്കിസ്ഥാന്‍റെ നീക്കം തടയാനാണ് റദ്ദാക്കൽ.

ലാഹോറിലെത്തിച്ച അഭിനന്ദനെ വൈകുന്നേരം നാലോടെ വാഗാ അതിര്‍ത്തിയിലെത്തുമെന്നാണ് കരുതുന്നത്. പ്രത്യേക വിമാനത്തിലാണ് അഭിനന്ദനെ പാക്കിസ്ഥാൻ ലാഹോറിലെത്തിച്ചത്. അവിടെ നിന്ന് പാകിസ്ഥാനിലെ ഇന്ത്യൻ സ്ഥാനപതിക്ക് കൈമാറുന്ന അഭിനന്ദനെ വാഗയിൽ വ്യോമസേനാ പ്രതിനിധികൾ സ്വീകരിക്കും. വ്യോമ സേനയുടെ ഗ്രൂപ്പ് കമാന്‍റന്‍റ് ജെ.ഡി കുരിയനാണ് ഇന്ത്യയിലേക്ക് സ്വീകരിക്കുന്നത്.

Deputy Commissioner Shiv Dular Singh Dhillon, Amritsar: The Beating the Retreat ceremony (at Attari-Wagah Border) will not be held today. Senior team of the Indian Air Force will receive Wing Commander #AbhinandanVarthaman. pic.twitter.com/n40CcJX7H6
— ANI (@ANI) March 1, 2019

അഭിനന്ദിനെ സ്വീകരിക്കാനായി അദ്ദേഹത്തിന്‍റെ കുടുംബാംഗങ്ങളും ഉന്നത സൈനിക ഉദ്യോഗസ്ഥരും അമൃത്സറിൽ എത്തിയിട്ടുണ്ട്. വന്‍ സ്വീകരണമാണ് ജനങ്ങളും വിംഗ് കമാന്‍ഡറിന്നായി രാജ്യം ഒരുക്കിയിരിക്കുന്നത്. ഇന്ത്യയിലെത്തുന്ന അഭിനന്ദനെ മെഡിക്കൽ ചെക്കപ്പിന് വിധേയനാക്കിയ ശേഷം ഡി ബ്രീഫിംഗ് നടക്കും. ഇതിനുശേഷമേ മാധ്യമങ്ങളെ കാണാൻ അനുവദിക്കൂ.

ഇന്ത്യയിലേക്ക് അതിക്രമിച്ചു കടന്ന പാക് വ്യോമസേനയുടെ എഫ്-16 വിമാനം വീഴ്ത്തുന്നതിനിടെയാണ് അഭിനന്ദന്‍റെ വിമാനം മിസൈലേറ്റു തകർന്നത്. നിരുപാധികമാണ് അഭിനന്ദന്‍റെ മോചനം എന്നാണ് ഇന്ത്യാ ഗവൺമെന്‍റ് വ്യക്തമാക്കിയത്.