പുൽവാമ ഭീകരാക്രമണം ദാരുണം; ഉചിതമായ സമയത്ത് അഭിപ്രായം വ്യക്തമാക്കുമെന്ന് ട്രംപ്

വാഷിംഗ്ടൺ: പുൽവാമ ഭീകരാക്രമണം ദാരുണമായ സാഹചര്യമായിരുന്നെന്ന് വിശദീകരിച്ച് അമേരിക്കൻ പ്രസിഡന്‍റ് ഡോണൾഡ് ട്രംപ്. തങ്ങൾ ഇതു സംബന്ധിച്ച് റിപ്പോർട്ട് തേടിയിട്ടുണ്ടെന്നും അദ്ദേഹം പറഞ്ഞു. വൈറ്റ്ഹൗസിൽ മാധ്യമങ്ങളുടെ ചോദ്യങ്ങൾക്ക് മറുപടിപറയുകയായിരുന്നു അദ്ദേഹം.

ദക്ഷിണേഷ്യൻ അയൽക്കാർ തമ്മിൽ യോജിപ്പിലെത്തിയാൽ അത് അദ്ഭുതരകമാണെന്നും അദ്ദേഹം കൂട്ടിച്ചേർത്തു. താൻ ഇത് കണ്ടിരുന്നു. പുൽവാമയുമായി ബന്ധപ്പെട്ട് നിരവധി റിപ്പോർട്ടുകളും ലഭിച്ചു. വിഷയത്തിൽ ഉചിതമായ സമയത്ത് അഭിപ്രായം പറയും. ഇന്ത്യയും പാക്കിസ്ഥാനും സൗഹൃദത്തിലായാൽ അത് അദ്ഭുതകരമാണെന്നും ട്രംപ് പറഞ്ഞു. അത് ദാരുണമായ അവസ്ഥയായിരുന്നു. തങ്ങൾക്ക് റിപ്പോർട്ട് ലഭിച്ചിട്ടുണ്ട്. ശരിയായ സമയത്ത് പ്രസ്താവന നടത്തുമെന്നും ട്രംപ് അറിയിച്ചു.

ഭീകരാക്രമണത്തിന്‍റെ വേരറുക്കാൻ ഇന്ത്യൻ സർക്കാരുമായി ചേർന്നു പ്രവർത്തിക്കുകയാണെന്നു യുഎസ് അംബാസഡർ കെന്നത്ത് ജസ്റ്റർ നേരത്തെ പറഞ്ഞിരുന്നു. പുൽവാമ ആക്രമണത്തെ യുഎസ് അപലപിച്ചിരുന്നു. പാക്കിസ്ഥാനു സൈനിക സഹായം നൽകുന്നതു യുഎസ് നിർത്തിവച്ചതായും ബംഗളൂരുവിൽ കെന്നത്ത് പറഞ്ഞു.

ഇസ്രയേലും ഭീകരവാദത്തെ നേരിടാൻ ഇന്ത്യയ്ക്കു നിരുപാധിക പിന്തുണ വാഗ്ദാനം ചെയ്തു. ഇന്ത്യയിൽ പുതുതായി നിയമിതനായ ഇസ്രയേൽ സ്ഥാനപതി ഡോ. റോൺ മൽക്ക ആണു പിന്തുണ അറിയിച്ചത്. ഭീകരവാദം നേരിടുന്നതില്‍ ഉറ്റസുഹൃത്തായ ഇന്ത്യയെ സഹായിക്കുമെന്നും അദ്ദേഹം വ്യക്തമാക്കി.