പാക്കിസ്ഥാൻ ഒറ്റപ്പെടുന്നു; ഇന്ത്യയെ പിന്തുണച്ച് ഫ്രാൻസും രംഗത്ത്

പാരീസ്: പാക് അധീന കാഷ്മീരിലെ ഭീകരതാവളങ്ങളിൽ ഇന്ത്യ നടത്തിയ സൈനിക നീക്കത്തെ പിന്തുണച്ച് ഫ്രാൻസ്. അതിർത്തി കടന്നുള്ള ഭീകരപ്രവര്‍ത്തനം ചെറുക്കാനുള്ള ഇന്ത്യയുടെ ശ്രമങ്ങൾക്ക് പിന്തുണ നൽകുന്നു. സ്വന്തംമണ്ണിൽ ഭീകരസംഘടനകളുടെ പ്രവർത്തനം പാക്കിസ്ഥാൻ അവസാനിപ്പിക്കണമെന്നും ഫ്രാൻസ് വിദേശകാര്യ മന്ത്രാലയം വക്താവ് ആവശ്യപ്പെട്ടു.

നേരത്തെ ഇന്ത്യയെ അനുകൂലിച്ച് ഓസ്ട്രേലിയയും രംഗത്തെത്തിയിരുന്നു. ഭീകര ഗ്രൂപ്പുകൾക്കെതിരെ പാകിസ്ഥാൻ എത്രയും പെട്ടെന്ന് നടപടിയെടുക്കണം. ജയ്ഷെ മുഹമ്മദ് അടക്കമുള്ള ഭീകരസംഘടനകൾക്കെതിരെ അടിയന്തര നടപടികൾ പാക്കിസ്ഥാൻ എടുക്കണം. സ്വന്തം മണ്ണിൽ ഭീകരസംഘങ്ങൾ പ്രവർത്തിക്കുന്നത് പാക്കിസ്ഥാൻ ഇനിയും അനുവദിക്കരുതെന്നും ഓസ്ട്രേലിയൻ വിദേശകാര്യമന്ത്രി മാരിസ് പെയ്ൻ ആവശ്യപ്പെട്ടു.

ചൊവ്വാഴ്ച പുലർച്ചെയാണ് വ്യോമസേന പാക്കിസ്ഥാനിലെ ബാലകോട്ട്, ചകോതി, മുസഫറാബാദ് എന്നിവിടങ്ങളിലെ ഭീകരതാവളങ്ങൾ തകർത്തത്. ജയ്ഷെ കമാൻഡർമാർ ഉൾപ്പെടെ മുന്നൂറോളം പേർ ഇന്ത്യയുടെ മിന്നൽ ആക്രമണത്തിൽ മരിച്ചുവെന്നാണ് റിപ്പോർട്ടുകൾ. ആക്രമണം ഇന്ത്യയും പാക്കിസ്ഥാനും സ്ഥിരീകരിച്ചിട്ടുണ്ട്.

ബലാകോട്ടിൽ ഇന്ത്യ നടത്തിയ മിന്നലാക്രമണത്തിന് തിരിച്ചടിയുണ്ടാകുമെന്ന് പാക്കിസ്ഥാൻ വ്യക്തമാക്കിയിരുന്നു. ഇന്ത്യ നടത്തിയത് ന്യായീകരണമില്ലാത്ത കടന്നുകയറ്റമാണ്. ഉചിതമായ സമയത്ത് തിരിച്ചടിക്കുമെന്നും പാക്കിസ്ഥാൻ‌ പറഞ്ഞിരുന്നു.