കളം പിടിക്കാൻ ഇരട്ടകൾ : Deepika.com Auot Spot News

കളം പിടിക്കാൻ ഇരട്ടകൾ

Monday, November 5, 2018 2:46 PM IST

ടാറ്റാ മോട്ടോഴ്സ് അടുത്തിടെ അവതരിപ്പിച്ച രണ്ടു മോഡലുകളാണ് തിയാഗോ ജെടിപിയും ടിഗോർ ജെടിപിയും. സാധാരണക്കാരുടെ പോക്കറ്റിൽ ഒതുങ്ങുന്ന വിലയിൽ മികച്ച ഫീച്ചറുകൾ നല്കാൻ ടാറ്റാ മോട്ടോഴ്സ് ശ്രമിക്കുന്നതുകൊണ്ടുതന്നെ പുതിയ ഡിസൈനിലുള്ള രണ്ട് ജെടിപി മോഡലുകളും ഏറെ ശ്രദ്ധിക്കപ്പെടുകയും ചെയ്തിട്ടുണ്ട്. മികച്ച എൻജിൻ, പരിഷ്കരിച്ച സസ്പെൻഷൻ തുടങ്ങിയവ നല്കി സ്പോർട്ടി പരിവേഷത്തിലാണ് പുതിയ മോഡലുകളും ജന്മമെടുത്തിരിക്കുന്നത്.

വലിയ ഗ്രില്ലും എയർഡാമും

ഗ്ലോസി ബ്ലാക്ക് ഫിനിഷിംഗുള്ള പുതിയ ഗ്രിൽ, സ്റ്റാൻഡാർഡ് വേർഷനുകളിൽനിന്നു മാറി വലിയ എയർ ഡാം എന്നിവ എൻജിനിലേക്ക് കൂടുതൽ തണുത്ത വായു എത്താൻ സഹായിക്കുന്നു.

ചൂടു കളയാൻ വെന്‍റുകൾ

ബോണറ്റിലും വശങ്ങളിലും വെന്‍റുകൾ വെറും ഭംഗി മാത്രം ഉദ്ദേശിച്ചു നല്കിയിരിക്കുന്നതല്ല. എൻജിൻ പ്രവർത്തിക്കുന്നതിലൂടെ പുറംതള്ളുന്ന ചൂട് പുറത്തേക്ക് നിർഗമിപ്പിക്കാൻവേണ്ടിയാണിവ നല്കിയിരിക്കുന്നത്.

ഡുവൽ ടോണ്‍ തീം

ജെടിപി ഇരട്ടകൾ എന്ന് ഒറ്റ വാക്കിൽ വിളിക്കാവുന്ന ടിഗോറും തിയാഗോയും ഡുവൽ ടോണിലാണ് അവതരിപ്പിച്ചിരിക്കുന്നത്. ചുവന്ന കാറിന് ബ്ലാക്ക് ഫിനിഷ്ഡ് ഒൗട്ട്സൈഡ് റിയർവ്യൂ മിറർ നല്കിയിരിക്കുന്പോൾ വെളുത്ത വാഹനത്തിന് ചുവപ്പ് ഒആർവിഎം ആണ് നല്കിയിരിക്കുന്നത്. നിറത്തിൽ മാത്രമല്ല വശങ്ങളിലും 15 ഇഞ്ച് അലോയ് വീലുകളിലും കാഴ്ചസൗന്ദര്യം കന്പനി നല്കിയിട്ടുണ്ട്.

ഡുവൽ എസ്ഹോസ്റ്റ്

പിന്നിലെ ഡുവൽ എക്സ്ഹോസ്റ്റ് മറ്റൊരു ആകർഷണം. വാഹനത്തിന്‍റെ സ്റ്റബിലിറ്റി ഉയർത്താൻ ഇത് സഹായിക്കും.

എല്ലാം കറുപ്പ്

കറുത്ത ഡാഷ്ബോർഡ്, കറുത്ത സീറ്റുകൾ, ബ്ലാക്ക് ഹെഡ് ലൈനർ തുടങ്ങിയവ ഇന്‍റീരിയർ മനോഹരമാക്കുന്നു. സീറ്റിലും ലെതർ വ്രാപ്ഡ് സ്റ്റിയറിംഗിലും ചുവന്ന സ്റ്റിച്ചിംഗുകൾ. റെഡ് ഫിനിഷ്ഡ് എസി വെന്‍റുകളും നല്കിയിരിക്കുന്നു.

എക്സ് സെഡ് വേരിയന്‍റ് അടിസ്ഥാനം

രണ്ടു മോഡലുകളുടെയും എക്സ് സെഡ് വേരിയന്‍റിനെ അടിസ്ഥാനമാക്കിയാണ് ജെടിപി ചിട്ടപ്പെടുത്തിയിരിക്കുന്നത്.

മികച്ച സൗകര്യങ്ങൾ

8 സ്പീക്കർ ഓഡിയോ സിസ്റ്റം, സ്റ്റിയറിംഗ് മൗണ്ടഡ് ഓഡിയോ കണ്‍ട്രോൾ, ഹൈറ്റ് അഡ്ജസ്റ്റബിൾ ഡ്രൈവിംഗ് സീറ്റ്, ടിൽറ്റ് അഡ്ജസ്റ്റബിൾ സ്റ്റിയറിംഗ് വീൽ, 5 ഇഞ്ച് ടച്ച് സ്ക്രീൻ യൂണിറ്റ്, സ്മോക്ക്ഡ് പ്രൊജക്ടർ ഹെഡ് ലാന്പുകൾ, ഓട്ടോമാറ്റിക് ക്ലൈമറ്റ് കണ്‍ട്രോൾ, റിയർ സെൻട്രൽ ആം റെസ്റ്റ്, റിവേഴ്സ് കാമറ, എടുത്തിടെ അവതരിപ്പിച്ച ടിഗോർ എക്സ് സെഡ് പ്ലസിന്‍റെ ടെയിൽ ലാന്പ് എന്നിവ പ്രധാന ഫീച്ചറുകൾ.

വിശാലം

മുന്നിലെയും പിന്നിലെയും സീറ്റുകൾക്ക് ഒരേപോലുള്ള ലെഗ് സ്പേസ് വാഹനത്തിന് നല്കിയിട്ടുണ്ട്. കൂടാതെ ടിഗോർ ജെടിപിക്ക് ബൂട്ട് സ്പേസ് 419 ലിറ്ററാണെങ്കിൽ തിയാഗോ ജെടിപിക്ക് 265 ലിറ്റർ.

എൻജിൻ

1.2 ലിറ്റർ ടർബോ ചാർജ്ഡ് പെട്രോൾ എൻജിനാണ് കരുത്ത്. കോംപാക്ട് എസ് യുവി നെക്സോണിലും ഇതുതന്നെയാണ് നല്കിയിട്ടുള്ളത്. 114 പിഎസ് പവറിൽ 150 എൻഎം ടോർക്ക് ഉത്പാദിപ്പിക്കാൻ ഈ എൻജിനാകും. പൂജ്യത്തിൽനിന്ന് 100 കിലോമീറ്റർ വേഗം കൈവരിക്കാൻ പത്തു സെക്കൻഡുകൾ മാത്രം മതി.

സുരക്ഷ
ഡുവൽ എയർബാഗുകൾ, ആന്‍റി ലോക്ക് ബ്രേക്കിംഗ് സിസ്റ്റം, ഇലക്ട്രോണിക് ബ്രേക്ക്ഫോഴ്സ് ഡിസ്ട്രിബ്യൂഷൻ, കോർണർ സ്റ്റെബിലിറ്റി കണ്‍ട്രോൾ.
വില
ടിഗോർ ജെടിപി: 7.49 ലക്ഷം രൂപ
തിയാഗോ ജെടിപി: 6.52 ലക്ഷം രൂപ.

ഓട്ടോസ്പോട്ട്/ ഐബി
[email protected]