നോയിഡ: കുറഞ്ഞ വിലയിൽ കൂടുതൽ കരുത്തുള്ള റിയൽമീ 2 പ്രോ വിപണിയിൽ അവതരിപ്പിച്ചു. ഉത്തർപ്രദേശിലെ നോയിഡ അമിറ്റി യൂണിവേഴ്സിറ്റിയിൽ നടന്ന ചടങ്ങിൽ റിയൽമീ സി 1 എന്ന മോഡൽകൂടി പുറത്തിറക്കി.
ഓപ്പോയുടെ സബ്സിഡിയറി ബ്രാൻഡ് ആയി ഇന്ത്യയിലെത്തിയ റിയൽ മീ അടുത്ത കാലത്താണ് സ്വതന്ത്ര ബ്രാൻഡ് ആയത്. ഓണ്‍ലൈനിലൂടെ മാത്രമാണ് വില്പന.
വിപണിയിലെ കടുത്ത മത്സരത്തിന് പ്രാധാന്യം നല്കാതെ കരുത്തിനും രൂപത്തിനും പ്രധാന്യം നല്കിയാണ് ഇരു മോഡലുകളും അവതരിപ്പിച്ചിരിക്കുന്നതെന്ന് റിയർമീ ഇന്ത്യ സിഇഒ മാധവ് സേത് ചടങ്ങിൽ പറഞ്ഞു. റിയൽമീ 1, റിയൽമീ 2 എന്നീ ഉത്പന്നങ്ങൾ വിപണിയിലിറക്കി നാലു മാസംകൊണ്ട് 10 ലക്ഷം സ്മാർട്ട്ഫോൺ വിൽക്കാൻ കഴിഞ്ഞെന്ന് അദ്ദേഹം പറഞ്ഞു.
പ്രകൃതിയിൽനിന്ന് പ്രചോദനം ഉൾക്കൊണ്ട് ഡ്യൂ ഡ്രോപ് 6.3 ഇഞ്ച് ഫുൾ സ്ക്രീൻ ഡിസ്പ്ലേ ആണ് റിയൽ മീ 2 പ്രോയുടെ പ്രധാന പ്രത്യേകത. 15 ലെയർ ലാമിനേറ്റഡ് ബാക്ക് കവർ, ക്വാൽകോം സ്നാപ്ഡ്രാഗണ്‍ 660 എഐഇ പോസസർ, ആൻഡ്രോയ്ഡ് 8.1 ഒഎസ്, 16 എംപി എഐ ഡുവൽ പിൻ കാമറ, 16 എംപി എഐ ബ്യൂട്ടിഫൈ മുൻ കാമറ, ഡുവൽ വോൾട്ടി (4 ജി+ 4 ജി), നാനോ സിമ്മുകൾ, 3500 എംഎഎച്ച് ബാറ്ററി എന്നിവയാണ് മറ്റു പ്രത്യേകതകൾ.
ഐസ് ലേക്ക്, ബ്ലൂ ഓഷൻ, ബ്ലാക്ക് സീ എന്നീ നിറങ്ങളിൽ 4 ജിബി റാം + 64 ജിബി റോം, 6 ജിബി റാം + 64 ജിബി റോം, 8 ജിബി റാം + 128 ജിബി റോം എന്നിങ്ങനെ മൂന്നു വേരിയന്‍റുകളാണ് റിയൽമീ 2 പ്രോയ്ക്കുള്ളത്. യഥാക്രമം 13,990 രൂപ, 15,990 രൂപ, 17,990 രൂപ എന്നിങ്ങനെയാണ് വില.
എൻട്രി ലെവൽ സ്മാർട്ട്ഫോണ് വിഭാഗത്തിലാണ് റിയൽമീ സി 1 അവതരിപ്പിച്ചിരിക്കുന്നത്. ക്വാൽകോം സ്നാപ്ഡ്രാഗണ്‍ 450 ഒക്‌ടാ കോർ പോസസർ, ആൻഡ്രോയ്ഡ് 8.1 ഒഎസ്, 2 ജിബി റാം, 16 ജിബി റോം, 13 + 2 എംപി ഡുവൽ പിൻ കാമറ, 5 എംപി മുൻ കാമറ, ഡുവൽ വോൾട്ടി (4 ജി+ 4 ജി), നാനോ സിമ്മുകൾ, 4230 എംഎഎച്ച് മെഗാ ബാറ്ററി എന്നിവയാണ് റിയൽ മീ സി 1ന്‍റെ പ്രത്യേകതകൾ.
ഒക്‌ടോബർ 11ന് രാത്രി 12ന് റിയൽ മീ 2 പ്രോയും ഉച്ചയ്ക്ക് 12ന് സി 1 ഉം ഫ്ലിപ്കാർട്ടിൽ വിൽപ്പനയ്ക്കെത്തും.
ഗാഡ്ജെറ്റ് കഫെ / ഐബിൻ കാണ്ടാവനം