ആപ് "ആപ്പി'ലാക്കി! : Deepika.com Tech News |

ചേർത്തല: മൊബൈൽ ആപ് ഉപയോഗിച്ചു പണമിടപാടു നടത്തിയ യുവാവിന്‍റെ ബാങ്ക് അക്കൗണ്ടിൽനിന്ന് 45,000 രൂപയോളം നഷ്ടമായതായി പരാതി. ചേർത്തല വാരനാട് പീടികച്ചിറ വി. ജയറാമിനാണു പണം നഷ്ടപ്പെട്ടത്. പേടിഎം മൊബൈൽ ആപ് ഉപയോഗിച്ചു ഡിഷ് ടിവി കണക‌്ഷൻ റീചാർജ് ചെയ്തതിനു പിന്നാലെയാണ് എസ്ബിഐ വാരനാട് ശാഖയിലെ അക്കൗണ്ടിൽനിന്നു നാലു തവണയായി 44,998 രൂപ നഷ്ടപ്പെട്ടത്.

കഴിഞ്ഞ 12ന് രാത്രി 350 രൂപയ്ക്കു ഡിഷ് ടിവി റീചാർജ് ചെയ്തു. എന്നാൽ, ചാർജ് ആയി എന്നതിന്‍റെ മെസേജുകളൊന്നും വരാതിരുന്നതോടെ വീണ്ടും 350 രൂപ ട്രാൻസ്ഫർ ചെയ്തു. എന്നാൽ, അക്കൗണ്ടിൽനിന്നു രണ്ടു തവണ തുക ഈടാക്കിയതു മനസിലായതിനെത്തുടർന്ന് അധികമായി നല്കിയ തുക തിരിച്ചുവാങ്ങാൻ ഡിഷ് ടിവി കന്പനിയുടെ കസ്റ്റമർ കെയർ സെന്‍ററുമായി 13ന് രാവിലെ ജയറാം ബന്ധപ്പെട്ടു. റീചാർജിനു പണം ട്രാൻസ്ഫർ ചെയ്യാൻ ഉപയോഗിച്ച ആപ്പിന്‍റെ കസ്റ്റമർ കെയർ സെന്‍ററുമായി ബന്ധപ്പെട്ടാൽ പണം തിരിച്ചു കിട്ടുമെന്ന് അവർ അറിയിച്ചു. അതനുസരിച്ചു പേടിഎം കസ്റ്റമർ കെയറിൽ ബന്ധപ്പെട്ടപ്പോൾ അവർ ജയറാമിന്‍റെ എടിഎം കാർഡിലെ സിവിവി നന്പർ പറഞ്ഞുകേൾപ്പിക്കുകയും അധികമായി നല്കിയ തുക അക്കൗണ്ടിലേക്കു മാറ്റിയിയെന്ന് അറിയിക്കുകയുംചെയ്തു. 8617070213 എന്ന ഫോണ്‍ നന്പറിൽനിന്നാണ് വിവരങ്ങൾ നല്കിയത്. പത്തു മിനിട്ട് കഴിഞ്ഞപ്പോൾ 9,999, 20,000, 9,999, 5,000 രൂപ വീതം അക്കൗണ്ടിൽനിന്ന് പിൻവലിച്ചതായി മെസേജ് ലഭിച്ചു. സംശയം തോന്നിയ ജയറാം ഉടനെ എസ്ബിഐ കസ്റ്റമർ കെയർ സെന്‍ററിൽ ബന്ധപ്പെട്ട് എടിഎം കാർഡ് മരവിപ്പിച്ചു. ഇതു സംബന്ധിച്ച് ജയറാം ചേർത്തല പോലീസിൽ പരാതി നല്കി. പോലീസ് സൈബർ സെല്ലിന്‍റെ സഹായത്തോടെ അന്വേഷണം ആരംഭിച്ചു.