ആദ്യ ജയം 52 വർഷം മുന്പ്; പന്ത്രണ്ടാം പോരാട്ടത്തിൽ കെ.പി. സിംഗ് ദേവ്

രാജാ കാമാഖ്യ പ്രസാദ് സിംഗ് ദേവ് എന്ന കെ.പി. സിംഗ്ദേവ് 1967ൽ ഒഡീഷയിലെ ധെങ്കനാൽ മണ്ഡലത്തിൽ വിജയിച്ചുകയറുന്പോൾ രാഹുൽഗാന്ധി ജനിച്ചിട്ടില്ലായിരുന്നു, നരേന്ദ്ര മോദി കൗമാരക്കാരനായിരുന്നു. 52 വർഷത്തിനിടെ പന്ത്രണ്ടാമത്തെ തെരഞ്ഞെടുപ്പാണു സിംഗ് ദേവ്(78) നേരിടുന്നത്. ആറു ജയവും അഞ്ചു തോൽവിയുമാണു ധെങ്കനാൽ രാജാവിന്‍റെ അക്കൗണ്ടിലുള്ളത്. ഇന്ദിരാഗാന്ധി, രാജീവ്ഗാന്ധി, പി.വി. നരസിംഹറാവു എന്നീ പ്രധാനമന്ത്രിമാർക്കൊപ്പം പ്രവർത്തിച്ചതിന്‍റെ അനുഭവസന്പത്തുമായാണു സിംഗ്ദേവിന്‍റെ വരവ്.

1967ൽ സ്വതന്ത്രാ പാർട്ടി സ്ഥാനാർഥിയായി മത്സരിച്ച സിംഗ് ദേവ് 63.19 ശതമാനം വോട്ട് നേടി വിജയിച്ചു. കോണ്‍ഗ്രസിലെ എം.എം. പ്രധാൻ ആയിരുന്നു എതിരാളി. എന്നാൽ 1971ൽ കോണ്‍ഗ്രസിലെ ദേവേന്ദ്ര സത്പതിയോടു തോറ്റു. മുൻ ഒഡീഷ മുഖ്യമന്ത്രിയും ഉരുക്കുവനിത എന്ന് ഇന്ദിരാഗാന്ധി വിശേഷിപ്പിച്ചയാളുമായ നന്ദിനി സത്പതിയുടെ ഭർത്താവാണു ദേവേന്ദ്ര. 1977ൽ കോണ്‍ഗ്രസ് സ്ഥാനാർഥിയായി കെ.പി. സിംഗ് ദേവ് മത്സരിച്ചപ്പോൾ ദേവേന്ദ്ര സത്പതി മറുകണ്ടം ചാടി ലോക്ദൾ സ്ഥാനാർഥിയായി എത്തി. ഇന്ദിരാവിരുദ്ധതരംഗം ആഞ്ഞടിച്ച തെരഞ്ഞെടുപ്പിൽ വിജയം ദേവേന്ദ്ര സത്പതിക്കായിരുന്നു.

1980, 1984 തെരഞ്ഞെടുപ്പുകളിൽ അനായാസം വിജയിച്ച സിംഗ് ദേവ് 1989ൽ ഒഡീഷയിലെ ജനതാദൾ തരംഗത്തിൽ പരാജയപ്പെട്ടു. 1991ൽ ദേവേന്ദ്ര സത്പതിയുടെ മകൻ തഥാഗത സ്ത്പതിയായിരുന്നു സിംഗ് ദേവിന്‍റെ എതിരാളി. വിജയം സിംഗ്ദേവിനൊപ്പമായിരുന്നു. 1996ലും വിജയം ആവർത്തിച്ച ഇദ്ദേഹം 1998ൽ തഥാഗത സത്പതിയോടു തോറ്റു. 1999ൽ തഥാഗതയെ തോൽപ്പിച്ച് സിംഗ്ദേവ് പകരം വീട്ടി. എന്നാൽ 3674 വോട്ട് മാത്രമായിരുന്നു ഭൂരിപക്ഷം. 2004ൽ തഥാഗത സിംഗ് ദേവിനെ തോൽപ്പിച്ചു. ധെങ്കനാലിൽ കെ.പി. സിംഗ് ദേവ്-തഥാഗത സത്പതി പോരാട്ടം ഇരുവർക്കും രണ്ടു ജയവുമായി സമനിലയിലാണ്. 2009, 2014 തെരഞ്ഞെടുപ്പുകളിൽ കെ.പി. സിംഗ് ദേവ് മത്സരിച്ചില്ല. തഥാഗത രണ്ടു തവണയും വിജയിക്കുകയും ചെയ്തു. ഇനി മത്സരിക്കാനില്ലെന്ന് അറുപത്തിമൂന്നുകാരനായ തഥാഗത പ്രഖ്യാപിച്ചുകഴിഞ്ഞു. അതേസമയം, അച്ഛനെയും മകനെയും ആറു തവണ നേരിട്ട കെ.പി. സിംഗ് ദേവിന്‍റെ തെരഞ്ഞെടുപ്പ് പോരാട്ടം ഇനിയും തുടരുകയാണ്.

2009 ജനുവരിയിൽ കെ.പി. സിംഗ് ദേവ് പിസിസി അധ്യക്ഷനായി. ഇദ്ദേഹത്തിന്‍റെ നേതൃത്വത്തിലായിരുന്നു 2009 ലോക്സഭാ തെരഞ്ഞെടുപ്പിനെ കോണ്‍ഗ്രസ് നേരിട്ടത്. പിസിസി അധ്യക്ഷസ്ഥാനം ഒഴിഞ്ഞതോടെ ഇദ്ദേഹം സജീവരാഷ്ട്രീയത്തിൽനിന്നു വിട്ടുനിന്നു.

പ്രായത്തിന്‍റെ അവശതകളുണ്ടെങ്കിലും കെ.പി. സിംഗ്ദേവ് വർധിതവീര്യത്തോടെയാണ് ഇത്തവണ മത്സരരംഗത്തെത്തിയിരിക്കുന്നത്. “സീറ്റിനായി ആരെയും സമീപിച്ചിട്ടില്ല. പാർട്ടി ഹൈക്കമാൻഡിന്‍റെ തീരുമാനം അനുസരിക്കുക മാത്രമാണു ചെയ്തത്. ഇത് എന്‍റെ അവസാന തെരഞ്ഞെടുപ്പാണ്. ധെങ്കനാലിൽ ഞാൻ ആരംഭിച്ച പദ്ധതികളുടെ പൂർത്തീകരണമാണു ലക്ഷ്യം-സിംഗ്ദേവ് പറഞ്ഞു. എന്നാൽ, സിംഗ്ദേവിന് ഇത്തവണ കാര്യങ്ങൾ അത്ര എളുപ്പമല്ല. 2014ൽ കോണ്‍ഗ്രസ് മൂന്നാംസ്ഥാനത്തായിരുന്നു. 20 ശതമാനം വോട്ടായിരുന്നു കോണ്‍ഗ്രസിനു കിട്ടിയത്.

ഇത്തവണ മഹേഷ് സാഹൂവാണു ബിജെഡി സ്ഥാനാർഥി. നാലു തവണ എംഎൽഎയായ ആളാണ് ഇദ്ദേഹം. രുദ്ര നാരായണ്‍ പാണിയാണു ബിജെപി സ്ഥാനാർഥി. 2014ൽ ഇദ്ദേഹം രണ്ടാംസ്ഥാനത്തായിരുന്നു.

ബിജോ മാത്യു

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.