മഞ്ഞളിന്‍റെ രാഷ്‌ട്രീയം

നിസാമാബാദ് മഞ്ഞൾകൃഷി ഏറെയുള്ള സ്ഥലമാണ്. ഏക്കറിന് ഒന്നരലക്ഷം രൂപയാകും കൃഷിച്ചെലവ്. 20 ക്വിന്‍റലാണ് ശരാശരി ഉത്പാദനം. അതായത് ക്വിന്‍റലിന് 7500 രൂപ കൃഷിച്ചെലവ്. ഇപ്പോൾ വില ക്വിന്‍റലിന് 4500 രൂപ. കർഷകർ രോഷാകുലരായതിന്‍റെ കണക്ക് തെലുങ്കാന കിസാൻ കോൺഗ്രസ് ചെയർമാൻ അന്വേഷ് റെഡ്ഡി വിശദീകരിച്ചു. ക്വിന്‍റലിന് 9000 രൂപയാണു കർഷകർ ചോദിക്കുന്നത്.

ദേശീയ മഞ്ഞൾ ബോർഡ് ഉണ്ടാക്കണം. കുറഞ്ഞ താങ്ങുവില പ്രഖ്യാപിക്കുകയോ സംഭരണം നടത്തുകയോ ചെയ്യണം. കർഷകരുടെ ആവശ്യങ്ങൾ ഇവയാണ്.

കവിത ഇക്കാര്യത്തിൽ ഒന്നും ചെയ്തില്ലെന്നു പറയാനാവില്ല. മഞ്ഞൾ ബോർഡിനുവേണ്ടി 2017-ൽ കവിത ഒരു സ്വകാര്യ ബിൽ ലോക്സഭയിൽ അവതരിപ്പിച്ചു. അതു പാസായില്ല.

മുൻപൊരിക്കൽ കർഷകരോടു നരേന്ദ്ര മോദിയുടെയും രാഹുൽ ഗാന്ധിയുടെയും മണ്ഡലങ്ങളിൽ പോയി കൂട്ടമായി പത്രിക സമർപ്പിക്കാൻ കവിത ആവശ്യപ്പെട്ടിരുന്നതാണ്. അത് ഇപ്പോൾ കവിതയെ തിരിഞ്ഞുകൊത്തുന്നു.

മഞ്ഞളിനു വിലയിടിഞ്ഞു; നിസാമാബാദിൽ വോട്ടിംഗ് യന്ത്രം പറ്റില്ല

ഹൈദരാബാദ്: തെലുങ്കാനയിലെ നിസാമാബാദ് ലോക്സഭാ മണ്ഡലത്തിൽ ഇത്തവണ ഇലക്‌ട്രോണിക് വോട്ടിംഗ് യന്ത്രം ഉപയോഗിക്കില്ല. കടലാസ് ബാലറ്റ് ഉപയോഗിക്കും. കാരണം സ്ഥാനാർഥി പ്രളയം. 185 സ്ഥാനാർഥികളാണ് ഇവിടെ മത്സരിക്കുന്നത്.

തെലുങ്കാന മുഖ്യമന്ത്രിയും ടിആർഎസ് തലവനുമായ കെ.ചന്ദ്രശേഖര റാവുവിന്‍റെ മകൾ കെ. കവിതയുടെ സിറ്റിംഗ് സീറ്റാണിത്.

മഞ്ഞളിന്‍റെ വിലയിടിവാണ് ഇത്രയേറെ സ്ഥാനാർഥികൾ മത്സരിക്കാൻ കാരണം. 175 കർഷകരാണ് തങ്ങളുടെ ദുരിതം ദേശീയ ശ്രദ്ധയിൽ കൊണ്ടുവരാൻ ഇവിടെ മത്സരിക്കുന്നത്. 500 കർഷകർ മത്സരിക്കാൻ ഉദ്ദേശിച്ചിരുന്നു. ടിആർഎസ് ഭീഷണിപ്പെടുത്തിയിട്ടും 245 പേർ പത്രിക നൽകി. അവരിൽനിന്ന് കുറേപ്പേരെ പിൻവലിപ്പിച്ചിട്ടും ഇത്രയും പേർ നിൽക്കുന്നുണ്ട്.

ഇലക്‌ട്രോണിക് വോട്ടിംഗ് മെഷീൻ സംവിധാനത്തിൽ നാലു മെഷീനുകൾ വരെ യോജിപ്പിച്ചു വയ്ക്കാം. ഓരോന്നിലും 16 വച്ച് മൊത്തം 64 സ്ഥാനാർഥികൾ വരെയേ പറ്റൂ എന്നർഥം. അതിൽ കൂടുതലായതുകൊണ്ട് കടലാസ് ബാലറ്റ് ഉപയോഗിക്കും.

റിക്കാർഡ് നൽഗോണ്ടയിൽ

ഏറ്റവും കൂടുതൽ സ്ഥാനാർഥികൾ മത്സരിച്ച ലോക്സഭാ നിയോജകമണ്ഡലം തെലുങ്കാനയിലെ നൽഗോണ്ടയാണ്. 1996-ൽ ഇവിടെ 480 പേരാണു മത്സരിച്ചത്. അക്കൊല്ലംതന്നെ കർണാടകത്തിലെ ബെൽഗാമിൽ 456 പേരും ഡൽഹിയിലെ ഈസ്റ്റ് ഡൽഹിയിൽ 122 പേരും മത്സരിച്ചു. 1991-ൽ ഈസ്റ്റ് ഡൽഹിയിൽ 105 പേരും 1989-ൽ ഹരിയാനയിലെ ഭിവാനിയിൽ 122 പേരും മത്സരിച്ചിട്ടുണ്ട്. 50 പേജുള്ള ബുക്കായിരുന്നു 1990-ൽ നൽഗോണ്ടയിലെ ബാലറ്റ് പേപ്പർ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.