അടിമാലി: താലൂക്ക് ആശുപത്രിയിൽ കാത്ത് ലാബ് സ്ഥാപിക്കാൻ ഇടുക്കി പാക്കേജിൽ നിന്നും 8.94 കോടി രൂപ അനുവദിച്ചതായി എ.രാജ എംഎൽഎ പറഞ്ഞു.ദേവികുളം, ഉടുന്പൻചോല, ഇടുക്കി മണ്ഡലങ്ങളിൽ നിന്നുള്ള രോഗികൾ പ്രധാനമായി ചികിത്സയ്ക്ക് എത്തുന്ന ആശുപത്രിയാണ് അടിമാലി താലൂക്കാശുപത്രി. ആശുപത്രിയുടെ പുതിയ ഒ പി ബ്ലോക്കിന്റെ കെട്ടിട ഉദ്ഘാടനം കഴിഞ്ഞ ദിവസം നടത്തിയിരുന്നു. ആശുപത്രിയുടെ അടിസ്ഥാന സൗകര്യ വികസനം ലക്ഷ്യമിട്ടുള്ള വിവിധ പ്രവർത്തനങ്ങൾ നടന്നു വരികയാണ്.
കാത്ത് ലാബ് സ്ഥാപിക്കാൻ കെട്ടിട സൗകര്യം ഒരുക്കിയിട്ടുണ്ടെങ്കിലും കാത്ത് ലാബ് പ്രവർത്തനം ആരംഭിക്കുന്നതിനുള്ള മറ്റ് സൗകര്യങ്ങൾ ഏർപ്പെടുത്തേണ്ടതുണ്ട്. സർക്കാരിന്റെ ഇപ്പോഴത്തെ ഇടപെടലിലൂടെ കാത്ത് ലാബ് പ്രവർത്തനക്ഷമമാക്കാൻ ആവശ്യമായ പ്രവർത്തനങ്ങൾ നടത്താനാകുമെന്നാണ് പ്രതീക്ഷ. ആശുപത്രിയിൽ പൂർണതോതിൽ കാത്ത് ലാബ് യാഥാർഥ്യമായാൽ തോട്ടം, ആദിവാസി മേഖലകളിലെ സാധാരണക്കാരായ നൂറുകണക്കിനാളുകൾക്ക് പ്രയോജനകരമായി മാറും.