ചങ്ങനാശേരി: താലൂക്കിലെ റേഷന്കടകളില് വാതില്പ്പടി വിതരണപ്രകാരം പച്ചരി എത്തിയില്ല. ഉള്ളത് കുത്തരിമാത്രം. കാര്ഡുടമകള്ക്ക് പച്ചരിയും ചാക്കരിയും നല്കാനാകാതെ റേഷന് വ്യാപാരികള് ബുദ്ധിമുട്ടില്. പച്ചരി സ്റ്റോക്കില്ലാത്തതിനാല് എവൈ കാര്ഡുടമകള്ക്കുപോലും വിതരണം ചെയ്യാന് കഴിയുന്നില്ല.
ചങ്ങനാശേരി താലൂക്കില് 148 റേഷന് കടകളാണുള്ളത്. നവംബറിലെ ചങ്ങനാശേരി താലൂക്ക് സപ്ലൈ ഓഫീല്നിന്നുള്ള റേഷന്കടകളിലെ വിതരണ പോളിസി വ്യാപാരികള്ക്ക് അയച്ചുകൊടുത്തിട്ടുണ്ട്. എന്നാല്, കടകളില് പച്ചരിയും ചാക്കരിയും എത്തിയിട്ടില്ല. പച്ചരി സ്റ്റോക്കില്ലെന്ന വിവരം സപ്ലൈ ഓഫീസ് അധികൃതരെ അറിയിച്ചിട്ടുണ്ടെന്ന് റേഷന് വ്യാപാരികള് പറഞ്ഞു.
എന്നാല്, ഗോഡൗണുകളിലേയും റേഷന് കടകളിലേയും സ്റ്റോക്ക് പരിശോധിച്ചശേഷം ആനുപാതികമായാണ് റേഷന്കടകളില് പച്ചരി, കുത്തരി, ചാക്കരി എന്നിവയുടെ വാതില്പ്പടി വിതരണം നടത്തുന്നതെന്നും പച്ചരി സ്റ്റോക്കില്ലെന്ന പരാതി ലഭിച്ചിട്ടില്ലെന്നുമാണ് സപ്ലൈ ഓഫീസില്നിന്നുള്ള വിശദീകരണം.
വാതില്പ്പടി വിതരണം ആരംഭിച്ചതെയുള്ളൂവെന്നും ഈ ആഴ്ച അവസാനത്തോടെ കടകളില് എത്തിക്കുമെന്നും അധികൃതര് ചൂണ്ടിക്കാട്ടി.
.
Tags : Local News Kottayam Nattuvishesham