പുതുക്കാട് ദേശീയപാതയോരത്തു പ്രവർത്തിച്ചിരുന്ന ഭിന്നശേഷിക്കാരന്റെ ചായക്കട സാമൂഹ്യവിരുദ്ധർ നശിപ്പിച്ചനിലയിൽ.
പുതുക്കാട്: ദേശീയപാതയോരത്തു പ്രവർത്തിച്ചിരുന്ന ഭിന്നശേഷിക്കാരന്റെ ചായക്കട സാമൂഹ്യവിരുദ്ധർ നശിപ്പിച്ചു. മുത്രത്തിക്കര സ്വദേശി വാഴേക്കാട്ടിൽ ഉണ്ണികൃഷ്ണന്റെ ചായക്കടയാണ് തിങ്കളാഴ്ച പുലർച്ചെ തകർത്തത്. പുതുക്കാട് സഹകരണബാങ്കിന്റെ സമീപത്ത് സർവീസ് റോഡിന്റെ ഓരത്തുള്ള പെട്ടിക്കടയാണു നശിപ്പിച്ചത്. കടയുടെ മുൻപിലെ ഷെഡ്ഡും പഴയ ഫ്രിഡ്ജും വലിച്ചെറിഞ്ഞ നിലയിലാണ്. പുതുക്കാട് പോലീസിൽ പരാതി നൽകി.
വർഷങ്ങളായി പാതയോരത്ത് ചായക്കട നടത്തി ഉപജീവനം നടത്തുന്നയാളാണ് ഉണ്ണികൃഷ്ണൻ. കാലിനു ചലനശേഷിയില്ലാത്ത ഉണ്ണികൃഷ്ണന്റെ ചായക്കടയിലേക്കുള്ള വെള്ളവും മറ്റു സാധനങ്ങളും എത്തിച്ചുനൽകി സഹായിക്കുന്നതു നാട്ടുകാരായ സുഹൃത്തുക്കളാണ്. രാവിലെ മുതൽ ഉച്ചതിരിഞ്ഞുവരെ പ്രവർത്തിക്കുന്ന കടയിൽനിന്നുള്ള വരുമാനത്തിലാണ് ഉണ്ണികൃഷ്ണന്റെ കുടുംബം കഴിയുന്നത്.
Tags : dissident's tea stall