കാലം അതിവേഗത്തിൽ മാറിക്കൊണ്ടിരിക്കുകയാണ്. വിദ്യാഭ്യാസ മേഖലയും മാറ്റത്തിനു വിധേയമായിക്കൊണ്ടിരിക്കുന്നു. പരന്പരാഗത കോഴ്സുകൾക്കു പുറമെ തൊഴിലധിഷ്ഠിതമായ പുത്തൻ കോഴ്സുകൾ രംഗപ്രവേശനം ചെയ്തു കഴിഞ്ഞു. അത്തരത്തിലുള്ള ചില ന്യൂ ജനറേഷൻ കോഴ്സുകളെ നമുക്ക് പരിചയപ്പെടാം.
ഫുൾ സ്റ്റാക് ഡെവലപ്പ്മെന്‍റ്
ഒരു വെബ് ആപ്ലിക്കേഷന്‍റെ ഫ്രണ്ട് എൻഡും ബാക്ക് എൻഡും ഡെവലപ് ചെയ്തെടുക്കുന്നതാണ് ഫുൾസ്റ്റാക് ഡെവലപ്പറുടെ ദൗത്യം.
കുറച്ചു കൂടി വ്യക്തമായിപ്പറഞ്ഞാൽ, ഫ്രണ്ട് എൻഡ് ഡെവലപ്പറെയും ബാക്ക് എൻഡ് ഡെവലപ്പറെയും പോലെ ഒരു വിഭാഗത്തിൽ മാത്രം ഒതുങ്ങാതെ ഒരു വെബ് ആപ്ലിക്കേഷൻ പൂർണമായി ഡെവലപ് ചെയ്യുന്നവരാണെന്നർഥം. ഈ മേഖലയിലെ അടിസ്ഥാന തത്വങ്ങൾ മനസിലാക്കി ഒരു കരിയർ കെട്ടിപ്പടുക്കാൻ ഈ കോഴ്സു വഴി സാധിക്കും.
ഡാറ്റാബേസുകൾ, സർവറുകൾ, സിസ്റ്റംസ് എൻജിനിയറിംഗ് തുടങ്ങിയവയിൽ വൈദഗ്ധ്യമുള്ളയാളാണ് ഒരു മികച്ച ഫുൾ സ്റ്റാക് ഡെവലപ്പർ. യോഗ്യത: ബിടെക്( ECE, CSE, IT, EEE തുടങ്ങിയ സർക്യൂട്ട് ബ്രാഞ്ചുകൾ). ബിസിഎ, എംസിഎ, എംടെക്(സർക്യൂട്ട് ബ്രാഞ്ചുകൾ), ബിഎസ്‌സി/എംഎസ്‌സി (ഇലക്ട്രോണിക്സ്, കംപ്യൂട്ടർ സയൻസ്, ഐടി, സർക്യൂട്ട് ബ്രാഞ്ചുകൾ).
ഡാറ്റാ സയൻസ് ആൻഡ് അനലിറ്റിക്സ്
ഇന്ന് ഏറ്റവും അധികം വിലയുള്ള ഒന്നാണ് ഡാറ്റാ. ഡാറ്റ ശാസ്ത്രീയമായി കൈകാര്യം ചെയ്യുന്നതെങ്ങനെയെന്നു പഠിക്കാൻ ഈ കോഴ്സ് അവസരമൊരുക്കുന്നു. ബിരുദം പൂർത്തിയാക്കിയവർക്കും പ്രൊഫഷണൽസിനും അനുയോജ്യമായ കോഴ്സാണിത്. ഡാറ്റയുടെ ശേഖരണത്തിനും സൂക്ഷിക്കുന്നതിനും വിശകലനം ചെയ്യുന്നതിനുമുള്ള പരിശീലനമാണ് ഈ കോഴ്സിലൂടെ ലഭിക്കുന്നത്.
നിരവധി ഡിജിറ്റൽ സോഴ്സുകളിൽ നിന്ന് ഒരേസമയം വിവരശേഖരണം നടത്തി ട്രെൻഡുകളും പാറ്റേണുകളും മനസിലാക്കി തീരുമാനങ്ങളെടുക്കുന്ന പ്രക്രിയകളാണ് ഡാറ്റ സയൻസിൽ പഠിക്കാനുള്ളത്. ആറുമാസമാണ് കോഴ്സ് കാലാവധി. ഏതെങ്കിലും എൻജിനിയറിംഗ്, സയൻസ് വിഷയങ്ങളിൽ ബിരുദം ഉള്ളവർക്ക് അപേക്ഷിക്കാം.
റോബോട്ടിക് പ്രോസസ് ഓട്ടോമോഷൻ
ഇന്ന് ഇന്ത്യയിലും വിദേശത്തും ഒട്ടനവധി തൊഴിൽ സാധ്യത ഒരുക്കുന്ന ഒരു കോഴ്സാണ് റോബോട്ടിക് പ്രോസസ് ഓട്ടോമേഷൻ. സ്ഥിരമായി നടക്കുന്ന ആവർത്തന സ്വഭാവമുള്ള ജോലികൾ ചെയ്യുന്നതിൽ നിന്ന് പരമാവധി മാൻപവർ ഒഴിവാക്കി അതിവേഗത്തിലും കൃത്യതയോടെയും സോഫ്റ്റ് വേർ ബോട്ടുകൾ ചെയ്യുന്നതിനെയാണ് റോബോട്ടിക് പ്രോസസ് ഓട്ടോമോഷൻ എന്നു വിളിക്കുന്നത്.
ബാങ്കിംഗ് ഉൾപ്പെടെയുള്ള നിരവധി മേഖലകളിൽ ഇന്ന് റോബോട്ടിക് പ്രോസസ് ഓട്ടോമോഷനിൽ വിദഗ്ധരായവരെ ആവശ്യമുണ്ട്. എൻജിനിയറിംഗ്/കംപ്യൂട്ടർ സയൻസ് ബിരുദമാണ് പഠിക്കാൻ യോഗ്യത.
സൈബർ സെക്യൂരിറ്റി അനലിറ്റിക്സ്
സൈബർ സ്പേസ് വ്യപകമാകുന്ന കാലമാണ്. സൈബർ ആക്രമണങ്ങളും വർധിക്കുന്നു. ഈ കാലത്ത് സൈബർ സെക്യൂരിറ്റി അനലിസ്റ്റിന്‍റെ പ്രാധാന്യം ഏറെയാണ്. സൈബർ ആക്രമണങ്ങളിൽ നിന്ന് ഡാറ്റകൾക്കും കംപ്യൂട്ടർ, സ്മാർട്ട്ഫോണ് എന്നിവയുൾപ്പെടെയുള്ള ഉപകരണങ്ങൾക്കും സംരക്ഷണം ഉറപ്പാക്കുകയാണ് സൈബർ സെക്യൂരിറ്റി അനലിസ്റ്റിന്‍റെ പ്രധാന ജോലി.
ഇവരുടെ ജോലി. കൂടാത, ഹാക്കിംഗ്, മാൽവേർ, ഫിഷിംഗ്, ഇന്‍റർനെറ്റ് ആക്രമണങ്ങൾ, ഡേറ്റ ബ്രീചെസ്, സ്പൈയിംഗ് തുങ്ങിയ കുറ്റകൃത്യങ്ങളെ പ്രതിരോധിക്കുകയെന്നതും ഇവരുടെ ജോലിയാണ്. ആറുമാസമാണ് കോഴ്സ് ദൈർഘ്യം. എൻജിനിയറിംഗ്/കംപ്യൂട്ടർ സയൻസ്/ സയൻസ് ബിരുദമുള്ളവർക്ക് പഠിക്കാം.
ഡിജിറ്റൽ മാർക്കറ്റിംഗ്
വർത്തമാനകാലത്ത് കേട്ടുപരിചയപ്പെട്ട വാക്കാണ് ഡിജിറ്റൽ മാർക്കറ്റിംഗ്. ലോക്ഡൗണ് കച്ചവടക്കാരെ പ്രതിസന്ധിയിലാക്കിയപ്പോൾ ബിസിനസ് ഓണ്‍ലൈനിലേക്ക് മാറ്റിയ ഒട്ടനവധിപ്പേർ നമുക്ക് ചുറ്റുമുണ്ട്.
ചെറുകിട കച്ചവടക്കാർക്ക് മുതൽ വൻകിട ബിസിനസ് സംരംഭകർക്ക് വരെ തങ്ങളുടെ ബിസിനസ് ഓണ്‍ലൈനിലേക്ക് മാറ്റുന്നതിനും അതിലൂടെ ബിസിനസ് വളർത്തുന്നതിനും സഹായിക്കുന്നവരെ പൊതുവേ വിളിക്കുന്ന പേരാണ് ഡിജിറ്റർ മാർക്കറ്റിംഗ് വിദഗ്ധർ എന്ന്.
ആധുനിക കാലത്ത് ഓണ്‍ലൈൻ ട്രാൻസാക്ഷനുകൾ നിത്യജീവിതത്തിന്‍റെ ഭാഗമായിക്കഴിഞ്ഞു. അക്കാരണത്താൽത്തന്നെ ഡിജിറ്റൽ മാർക്കറ്റിംഗ് രംഗം ഒരുക്കുന്നത് ഒട്ടനവധി തൊഴിൽ അവസരങ്ങളാണ്. ഡിജിറ്റൽ മാർക്കറ്റിംഗ് കോഴ്സിലൂടെ മികച്ച കരിയർ സൃഷ്ടിച്ചെടുക്കാൻ സാധിക്കും. ഉഡാസിറ്റി കോഴ്സ് നല്ലതാണ്.
ആറു മാസം ദൈർഘ്യം വരുന്ന പ്രോഗ്രാം ആണ് നാനോ ഡിഗ്രി ഡിജിറ്റൽ മാർക്കറ്റിംഗ്.
ലിങ്ക്: https://in.udacity.com.
സോഫ്റ്റ്വേർ ടെസ്റ്റിംഗ്
വിവിധ ആവശ്യങ്ങൾക്കായി നിർമിക്കപ്പെട്ടിട്ടുള്ള സോഫ്റ്റ്വേറുകളുടെ ഗുണനിലവാരം ഉറപ്പുവരുത്തുന്നതിനെയാണ് സോഫ്റ്റവേർ ടെസ്റ്റിംഗ് എന്ന് വിളിക്കുന്നത്. കംപ്യൂട്ടർ യുഗത്തിൽ മികച്ച പരിശീലനം ലഭിച്ച സോഫ്റ്റ് വേർ ടെസ്റ്റർക്ക് വൻ ഡിമാൻഡാണ് ഇൻഡസ്ട്രിയിൽ.
ഓരോ ദിനവും ഇവരുടെ ആവശ്യകത വർധിക്കുന്ന സാഹചര്യം കണക്കാക്കിയാൽ മികച്ച കരിയർ ആഗ്രഹിക്കുന്നവർക്ക് ഈ കോഴ്സ് ഏറെ ഗുണം ചെയ്യും. തുടക്കത്തിൽ ടെസ്റ്റ് എൻജിനിയറായി കരിയർ ആരംഭിക്കുന്ന ഒരാൾക്ക് പിന്നീട് സീനിയർ ടെസ്റ്റ് എൻജിനിയർ, ടെസ്റ്റ് മാനേജർ തുടങ്ങിയ തലങ്ങളിലേക്ക് ഉയരാൻ കഴിയും. സോഫ്റ്റ് വേർ ടെസ്റ്റിങ്ങിന്‍റെ ആവശ്യകത, വിവിധ ടെസ്റ്റിംഗ്് രീതികൾ, ടൂൾസ് തുടങ്ങിയവയാണ് ഈ കോഴ്സിലൂടെ പഠിപ്പിക്കുന്നത്.
മുകളിൽ പറഞ്ഞിരിക്കുന്ന കോഴ്സുകൾ പഠിക്കാൻ സ്കോളർഷിപ്പോടെ നോർക്ക റൂട്സ് അവസരമൊരുക്കുന്നുണ്ട്. കൂടുതൽ വിവരങ്ങൾക്ക് 7594051437 എന്ന നന്പറുമായി ബന്ധപ്പെടുകയോ www.ictker ala.org എന്ന വെബ്സൈറ്റ് സന്ദർശിക്കുകയോ ചെയ്യുക.