ഗവണ്‍മെന്‍റ്/സ്വാശ്രയ സ്ഥാപനങ്ങളിലെ 2019-20 വർഷത്തെ പ്രഫഷണൽ ഡിപ്ലോമ ഇൻ ഫാർമസി, ഹെൽത്ത് ഇൻസ്പെക്ടർ ആൻഡ് പാരാമെഡിക്കൽ കോഴ്സുകളിലേക്കുള്ള പ്രവേശനത്തിന് അപേക്ഷ ക്ഷണിച്ചു. എൽബിഎസ് സെന്‍റർ ഡയറക്ടറുടെ www.lbscentre.kerala.gov.in എന്ന വെബ്സൈറ്റ് വഴി ഓണ്‍ലൈനായി ഒക്ടോബർ 11 വരെ അപേക്ഷിക്കാം.
ഫാർമസി (ഡിഫാം), ഹെൽത്ത് ഇൻസ്പെക്ടർ (ഡിഎച്ച്ഐ), മെഡിക്കൽ ലബോറട്ടറി ടെക്നോളജി (ഡിഎംഎൽടി), റേഡിയോളജിക്കൽ ടെക്നോളജി (ഡിആർടി), ഒഫ്താൽമിക് അസിസ്റ്റൻസ് (ഡിഒഎ), ദന്തൽ മെക്കാനിക്സ് (ഡിഎംസി), ദന്തൽ ഹൈജീനിസ്റ്റ്സ് (ഡിഎച്ച്സി), ഓപ്പറേഷൻ തിയറ്റർ ആൻഡ് അനസ്തേഷ്യ ടെക്നോളജി (ഡിഒടിഎടി), കാർഡിയോ വാസ്കുലർ ടെക്നോളജി (ഡിസിവിടി), ന്യൂറോ ടെക്നോളജി (ഡിഎൻടി), ഡയാലിസിസ് ടെക്നോളജി (ഡിഡിടി), എൻഡോസ്കോപിക് ടെക്നോളജി (ഡിഇടി), ഡെന്‍റൽ ഓപ്പറേറ്റിംഗ് റൂം അസിസ്റ്റന്‍റ്സ് (ഡിഎ), റെസ്പറേറ്ററി ടെക്നോളജി (ഡിആർ), സെൻട്രൽ സ്റ്റെറയിൽ സപ്ലൈ ഡിപ്പാർട്ട്മെന്‍റ് ടെക്നോളജി (ഡിഎസ്) എന്നീ 15 ഡിപ്ലോമ കോഴ്സുകളിലേക്കാണ് അപേക്ഷിക്കാവുന്നത്.
യോഗ്യത
ഡിപ്ലോമ ഇൻ ഫാർമസി (ഡിഫാം): ഫിസിക്സ്, കെമിസ്ട്രി, ബയോളജി/മാത്തമാറ്റിക്സ്/ബയോ ടെക്നോളജി/കംപ്യൂട്ടർ സയൻസ് എന്നിവ ഐശ്ചിക വിഷയങ്ങളായി ഹയർ സെക്കൻഡറി പരീക്ഷയോ തത്തുല്യ പരീക്ഷയോ പാസായവർക്ക് അപേക്ഷിക്കാം
ഡിപ്ലോമ ഇൻ ഹെൽത്ത് ഇൻസ്പെക്ടർ: ഫിസിക്സ്, കെമിസ്ട്രി, ബയോളജിക്ക് ആകെ 40 ശതമാനമെങ്കിലും മാർക്കോടെ ഹയർ സെക്കൻഡറി പരീക്ഷയോ തത്തുല്യ പരീക്ഷയോ വിജയിച്ചവർക്ക് അപേക്ഷിക്കാം. എസ്‌സി/എസ്ടി അപേക്ഷകർക്ക് അഞ്ച് ശതമാനം മാർക്കിളവിന് അർഹതയുണ്ട്. അപേക്ഷകരുടെ അഭാവത്തിൽ ഏതെങ്കിലും വിഷയങ്ങളുടെ ഗ്രൂപ്പിൽ ആകെ 40 ശതമാനമെങ്കിലും മാർക്കോടെ ഹയർ സെക്കൻഡറി പരീക്ഷയോ തത്തുല്യ പരീക്ഷയോ വിജയിച്ചവരെയും പരിഗണിക്കും. എസ്‌സി/എസ്ടി അപേക്ഷകർക്ക് അഞ്ച് ശതമാനം മാർക്കിളവിന് അർഹതയുണ്ട്.
പാരാമെഡിക്കൽ കോഴ്സുകൾ (ഡിഫാം/ഡിഎച്ച്ഐ ഒഴികെ): ഫിസിക്സ്, കെമിസ്ട്രി, ബയോളജിക്ക് ആകെ 40 ശതമാനമെങ്കിലും മാർക്കോടെ ഹയർ സെക്കൻഡറി പരീക്ഷയോ തത്തുല്യ പരീക്ഷയോ വിജയിച്ചവർക്ക് അപേക്ഷിക്കാം. എസ്‌സി/എസ്ടി അപേക്ഷകർക്ക് അഞ്ച് ശതമാനം മാർക്കിളിവിന് അർഹതയുണ്ട്. ഫിസിക്സ്, കെമിസ്ട്രി, ബയോളജിക്ക് ആകെ 40 ശതമാനമെങ്കിലും മാർക്കോടെ വിഎച്ച്എസ്ഇ പരീക്ഷ പാസായവർക്കും അപേക്ഷിക്കാം. എസ്‌സി/എസ്ടി അപേക്ഷകർക്ക് അഞ്ച് ശതമാനം മാർക്കിളിവിന് അർഹതയുണ്ട്. മെഡിക്കൽ ലബോറട്ടറി ടെക്നോളജി, മെയിന്‍റനൻസ് ആൻഡ് ഓപ്പറേഷൻസ് ഓഫ് ബയോമെഡിക്കൽ എക്യുപ്മെന്‍റും ഇസിജി ആൻഡ് ഓഡിയോ മെട്രിക് ടെക്നോളജി വിഷയങ്ങളിൽ പരീക്ഷ പാസായവർക്ക് പ്രോസ്പെക്ടസ് പ്രകാരം സംവരണം ചെയ്ത ഡിഎംഎൽഡി (എംഎൽ), ഡിഒടിടി(ഒടി), ഡിസിവിടി എന്നീ കോഴ്സുകൾക്ക് പ്രവേശന അർഹതയുണ്ട്.
അപേക്ഷകർക്ക് 2019 ഡിസംബർ 31 ന് 17 -35 വയസ്. എല്ലാ കോഴ്സുകൾക്കും ഓണ്‍ലൈനായി ഒരു അപേക്ഷ സമർപ്പിച്ചാൽ മതിയാകും.
അപേക്ഷാഫീസ്: പൊതുവിഭാഗം - 400 രൂപ, പട്ടികജാതി/വർഗ വിഭാഗത്തിന് 200 രൂപ.
ഒക്ടോബർ 11 വരെ വെബ്സൈറ്റ് വഴി ഓണ്‍ലൈനായി അപേക്ഷ സമർപ്പിക്കാം. അപേക്ഷകർ ഓണ്‍ലൈൻ മുഖേനയോ അല്ലെങ്കിൽ വെബ്സൈറ്റിൽ നിന്നും ഡൗണ്ലോഡ് ചെയ്ത ചെല്ലാൻ ഉപയോഗിച്ച് ഫെഡറൽ ബാങ്കിന്‍റെ ഏതെങ്കിലും ഒരു ശാഖ വഴിയോ അപേക്ഷാഫീസ് അടയ്ക്കേണ്ടതാണ്.
സർവീസ് ക്വോട്ട അപേക്ഷകർ
സർവീസ് ക്വോട്ടയിൽ അപേക്ഷിക്കുന്നവർ അപേക്ഷാഫീസ് സർക്കാർ ട്രഷറിയിൽ 0210-03-105-99 എന്ന ഹെഡ് ഓഫ് അക്കൗണ്ടിൽ അടച്ചശേഷം പ്രോസ്പെക്ടസിലെ ഖണ്ഡിക 7.1.3 പ്രകാരം അപേക്ഷസമർപ്പിക്കണം. അപേക്ഷാ ഫോമിന്റെ പ്രിന്‍റൗട്ട് (ഹാർഡ് കോപ്പി) യാതൊരു കാരണവശാലും എൽബിഎസ് സെന്‍ററിലേക്ക് അയയ്ക്കേണ്ട. അപേക്ഷാർഥികൾ സമർപ്പിച്ച അപേക്ഷയുടെ പരിശോധനയ്ക്കുശേഷമുള്ള വിവരങ്ങൾ വെബ്സൈറ്റിൽ പ്രസിദ്ധീകരിക്കും.
പ്രസിദ്ധപ്പെടുത്തിയ വിവരങ്ങൾ പരിശോധിച്ച് ന്യൂനതകൾ ഉണ്ടെങ്കിൽ നിശ്ചിത സമയത്തിനുള്ളിൽ പരിഹരിക്കേണ്ടതാണ്. നിർദിഷ്ട തീയതിക്കുശേഷം ഇതിനുള്ള അവസരം നൽകുന്നതല്ല. കൂടുതൽ വിവരങ്ങൾക്ക്: www.lbscentre.kerala.gov.in