ഡ്രാഗണ്‍ കാപ്സ്യൂൾ പറന്നുയർന്നു!

Sunday, March 3, 2019 11:20 AM IST

സ്വകാര്യ അമേരിക്കൻ ബഹിരാകാശ കന്പനിയായ സ്പേസ് എക്സ് തങ്ങളുടെ ചെറിയ പേടകം- ഡ്രാഗണ്‍ കാപ്സ്യൂൾ വിജയകരമായി വിക്ഷേപിച്ചു. ഫ്ലോറിഡയിലെ കെന്നഡി സ്പേസ് സെന്‍ററിൽനിന്നായിരുന്നു വിക്ഷേപണം. 16 അടി നീളമുള്ള ഡ്രാഗണ്‍ കാപ്സ്യൂൾ, ഫാൽക്കണ്‍ 9 റോക്കറ്റിലാണ് ബഹിരാകാശത്തെത്തിയത്.

കാപ്സ്യൂൾ റോക്കറ്റിൽനിന്നു വിജയകരമായി വേർപെട്ടുവെന്നും ബഹിരാകാശ കേന്ദ്രത്തിലേക്കുള്ള യാത്രയിലാണെന്നും സ്പേസ് എക്സ് അറിയിച്ചു. ഹോളിവുഡ് ചിത്രം “ഏലിയനി’’ലെ റിപ്ലെ കഥാപാത്രത്തിന്‍റെ ഡമ്മിയും 181 കിലോഗ്രാം ഭാരമുള്ള പരീക്ഷണ ഉപകരണങ്ങളും വഹിച്ചാണ് ഡ്രാഗണ്‍ കാപ്സ്യൂളിന്‍റെ യാത്ര.

കാപ്സ്യൂൾ അന്താരാഷ്‌ട്ര ബഹിരാകാശത്തിലെത്തിയാൽ അവിടെയുള്ള മൂന്ന് ശാസ്ത്രജ്ഞർ ചേർന്നു ഡ്രാഗണ്‍ കാപ്സ്യൂളിന്‍റെ ക്ഷമതയും ശേഷിയും പരീക്ഷിക്കും. ചെറിയ പേടകങ്ങളിൽ( കാപ്സ്യൂൾ) ശാസ്ത്രജ്ഞരെയും യാത്രികരെയും ബഹിരാകാശത്തെത്തിക്കാനുള്ള പദ്ധതിയുടെ പരീക്ഷണാർഥമാണ് സ്പേസ് എക്സ് ഡ്രാഗണ്‍ കാപ്സ്യൂൾ വിക്ഷേപിച്ചത്.

ബഹിരാകാശത്തും ക്ഷമത തെളിയിച്ചാൽ നാസയുടെ സഹകരണത്തോടെ ഡ്രാഗണ്‍ കാപ്സ്യൂളിൽ ഈ വർഷം അവസാനത്തോടെ രണ്ടു ശാസ്ത്രജ്ഞരെ ബഹിരാകാശത്തെത്തിക്കാനാണു സ്പേസ് എക്സിന്‍റെ പദ്ധതി. സ്പേസ് എക്സിനും മറ്റൊരു സ്വകാര്യ കന്പനിയായ ബോയിംഗിനും നേരത്തെ നാസ, കാപ്സ്യൂളുകളുടെ നിർമാണത്തിനും പരീക്ഷണത്തിനും ധനസഹായം നൽകിയിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.