കളിപ്പാട്ടം ചോദിച്ച മക്കൾക്ക് അരുൺകുമാറിന്‍റെ കിടിലൻ സമ്മാനം: സുന്ദരി ഓട്ടോറിക്ഷ!

മക്കൾക്ക് കളിപ്പാട്ടങ്ങളും വാഹനങ്ങളും വാങ്ങിനൽകുന്ന അച്ഛൻമാരുടെ നാട്ടിൽ അരുണ്‍കുമാർ വാഹനങ്ങൾ നിർമിച്ചുനൽകുകയാണ്. വെറും മോഡലുകളല്ല അരുണ്‍കുമാറിന്‍റെ സമ്മാനങ്ങൾ; അസൽ ജീവനുള്ള വാഹനങ്ങളാണ് നിർമിച്ചുനൽകുന്നത്.

ജീപ്പും ബൈക്കും നിർമിച്ചുനൽകിയതിനുശേഷം ഏഴുമാസത്തെ കഠിനാധ്വാനത്തിലൂടെ മക്കളായ മാധവിനും കേശനിക്കും ഏറ്റവും പുതിയതായി അരുണ്‍കുമാർ നിർമിച്ചുനൽകിയത് സുന്ദരി എന്ന ഒരു ഓട്ടോറിക്ഷയാണ്. വെറും ഓട്ടോറിക്ഷ അല്ല, ഓജസും തേജസുമുള്ള ജീവനുള്ള ഓട്ടോറിക്ഷയാണ് നിർമിച്ചിരിക്കുന്നത്.

ബാറ്ററിയിൽ ഓടുന്ന അസൽ ’സുന്ദരി’ ജൻമമെടുത്തിരിക്കുന്നത് ഉപയോഗശൂന്യമായ വസ്തുക്കളിൽനിന്നുമാണ്. ഡിടിഎച്ച് ഡിഷ് ഉപയോഗിച്ചാണ് ഓട്ടോറിക്ഷയുടെ മുൻഭാഗം നിർമിച്ചിരിക്കുന്നത്. സൈക്കിളിന്‍റ ഡിസ്ക് ബ്രേക്ക് രീതിയാണ് ഉപയോഗിച്ചിരിക്കുന്നത.് 24 ഡിസി മോട്ടോറിൽ 12 വോൾട്ടിന്‍റെ രണ്ടു ബാറ്ററികൾ എന്നിവയും ഉപയോഗിച്ചു. 60 കിലോഗ്രാമോളം ഭാരമുള്ള ഓട്ടോറിക്ഷക്ക് 150 കിലോഗ്രാം വരെ ഭാരം വഹിക്കാൻ പറ്റും.

കിക്കറും ഇൻഡിക്കേറ്ററും വൈപ്പറും ഹെഡ്‌ലൈറ്റും ഒക്കെയുള്ള ഓട്ടോയിൽ ഫസ്റ്റ് എയ്ഡ് കിറ്റ് വരെയുണ്ട്. ഈ സുന്ദരിയിൽ ഇനി അല്പം സംഗീതം ആസ്വദിക്കണമെന്നുണ്ടെങ്കിൽ അതിനും വഴിയുണ്ട്. സ്വന്തമായി നിർമിച്ച പാട്ടുപെട്ടിയും ഈ ഓട്ടോയിലുണ്ട്.

ഇടുക്കി ജില്ലാ ആശുപത്രിയിൽ നഴ്സാണ് അരുണ്‍കുമാർ. ആതുരസേവന രംഗത്തിനിടയിൽ വീണുകിട്ടുന്ന ഒഴിവുസമയങ്ങളിലാണ് തന്‍റെ ഉള്ളിലെ എൻജിനിയർ പുറത്തുവരുന്നത്. തനിക്ക് എന്നും കൂട്ടായും സഹായമായും കട്ടപ്പന സർക്കാർ ആശുപത്രിയിൽ നഴ്സായ ഭാര്യ ആര്യയും ഉള്ളതാണ് അരുണ്‍കുമാറിന്‍റെ പ്രചോദനം.

കൂടാതെ അരുണ്‍ തന്‍റെ രചനാവൈഭവത്തിലൂടെ കട്ടപ്പനയുടെ മനോഹാരിത വരച്ചുകാട്ടി സമൂഹ മാധ്യമങ്ങളിൽ ഇടംനേടിയിട്ടുണ്ട്. ചെറുപ്പം മുതലേയുള്ള ’ലാലേട്ടനോടുള്ള’ ആരാധന അരുണ്‍കുമാർ തന്‍റെ സൃഷ്ടികളിലുടെയാണ് പ്രകടിപ്പിക്കുന്നത്.

കുട്ടികൾക്കായി സ്ഫടികം ലോറി നിർമിച്ചുനൽകുകയാണ് അടുത്ത ലക്ഷ്യം. കട്ടപ്പന സർക്കാർ ആശുപത്രി ക്വാട്ടേഴ്സിലാണ് ഇപ്പോൾ താമസം.