ഫെമ നിയമലംഘനം; തോമസ് ഐസക്കിന്റെ ഹർജി ഹൈക്കോടതി ഇന്ന് പരിഗണിക്കും
Wednesday, July 24, 2024 7:08 AM IST
കൊച്ചി: മസാലബോണ്ടിലെ ഫെമ നിയമലംഘനം അന്വേഷിക്കുന്ന ഇഡിയുടെ സമന്സ് ചോദ്യം ചെയ്തുള്ള കിഫ്ബിയുടെയും തോമസ് ഐസക്കിന്റെയും ഹർജി ഹൈക്കോടതി ഇന്ന് പരിഗണിക്കും.കേസിൽ തോമസ് ഐസകിനെ ചോദ്യം ചെയ്യുന്നത് നേരത്തെ ഹൈക്കോടതി വിലക്കിയിരുന്നു.
ചോദ്യം ചെയ്യണമെങ്കിൽ ലോക്സഭാ തെരഞ്ഞെടുപ്പ് കഴിയട്ടെയെന്നായിരുന്നു ഹൈക്കോടതി വ്യക്തമാക്കിയത്. സിംഗിൾ ബെഞ്ചിന്റെ വിധി ചോദ്യം ചെയ്ത് ഇഡി ഡിവിഷൻ ബെഞ്ചിനെ സമീപിച്ചെങ്കിലും സിംഗിൾ ബെഞ്ചിന്റെ ഉത്തവ് ഡിവിഷൻ ബെഞ്ച് ശരിവയ്ക്കുകയായിരുന്നു.
തോമസ് ഐസക്ക് ലോക്സഭാ തെരഞ്ഞെടുപ്പില് സ്ഥാനാര്ഥിയാണെന്നും തെരഞ്ഞെടുപ്പ് കഴിഞ്ഞ് ഇഡിക്ക് വിശാലമായി അന്വേഷിക്കാമെന്നുമായിരുന്നു ഡിവിഷൻ ബഞ്ചിന്റെ നിലപാട്. ഇഡിയുടെ അപ്പീൽ തെരഞ്ഞെടുപ്പിനുശേഷം പരിഗണിക്കാമെന്നും ഡിവിഷൻ ബെഞ്ച് വ്യക്തമാക്കി.
ഫെമ നിയമലംഘനം അന്വേഷിക്കാന് ഡോ. ടി.എം.തോമസ് ഐസകിനെ ചോദ്യം ചെയ്യേണ്ടത് അനിവാര്യമാണ് എന്നാണ് ഇഡിയുടെ വാദം. ഫെമ നിയമലംഘനം അന്വേഷിക്കാന് ഇഡിക്ക് അധികാരമില്ലെന്നാണ് തോമസ് ഐസകിന്റെ നിലപാട്. ഹര്ജികളില് ജസ്റ്റീസ് ടി.ആര്. രവി അധ്യക്ഷനായ സിംഗിള്ബെഞ്ചാണ് ഇന്ന് വാദം കേള്ക്കുന്നത്.
കിഫ്ബിക്കും തോമസ് ഐസകിനും വേണ്ടി സുപ്രീം കോടതിയിലെ മുതിര്ന്ന അഭിഭാഷകരായ അരവിന്ദ് ദത്താര്, ജയദീപ് ഗുപ്ത എന്നിവര് ഹാജരാകും. അഡീഷണല് സോളിസിറ്റര് ജനറല് എആര്എല് സുന്ദരേശനാണ് എന്ഫോഴ്സ്മെന്റ് ഡയറക്ടറേറ്റിന് വേണ്ടി ഹാജരാകുന്നത്.