ബജറ്റിൽ പരിഗണിച്ചില്ല; നീതി ആയോഗ് യോഗം ഡിഎംകെ ബഹിഷ്കരിക്കും
Wednesday, July 24, 2024 1:29 AM IST
ന്യൂഡൽഹി: ശനിയാഴ്ചത്തെ നീതി ആയോഗ് യോഗം കോൺഗ്രസ് ബഹിഷ്കരിക്കുമെന്ന് പ്രഖ്യാപിച്ചതിനു പിന്നാലെ ഡിഎംകെയും രംഗത്ത്. ബജറ്റിൽ തമിഴ്നാടിനോട് അവഗണന കാണിച്ചെന്ന് ആരോപിച്ച് നീതി ആയോഗ് യോഗം ബഹിഷ്കരിക്കുമെന്ന് മുഖ്യമന്ത്രി സ്റ്റാലിൻ പറഞ്ഞു.
ദക്ഷിണേന്ത്യൻ സംസ്ഥാനങ്ങളെ കേന്ദ്രം അവഗണിച്ചെന്നും കേന്ദ്ര ബജറ്റിനെതിരായ പ്രതിഷേധത്തിന്റെ ഭാഗമാണ് യോഗം ബഹിഷ്കരിക്കുന്നതെന്നും അദ്ദേഹം വ്യക്തമാക്കി. വിഷയത്തിൽ ബുധനാഴ്ച ഡിഎംകെ എംപിമാർ പാർലമെന്റിൽ പ്രതിഷേധിക്കും.
ചൊവ്വാഴ്ച കേന്ദ്രമന്ത്രി നിർമല സീതാരാമൻ അവതരിപ്പിച്ച ബജറ്റ് അങ്ങേയറ്റം വിവേചനപരമാണെന്ന് കോൺഗ്രസ് ആരോപിച്ചു. രാജ്യത്തെ ഫെഡറൽ തത്വങ്ങൾക്ക് വിരുദ്ധമാണ് ബജറ്റെന്ന് എഐസിസി ജനറല് സെക്രട്ടറി കെ.സി. വേണുഗോപാല് പറഞ്ഞു.