സ്കൂട്ടറിൽ കാറ് ഇടിച്ചു; കോളജ് വിദ്യാർഥിനിക്ക് ദാരുണാന്ത്യം
Tuesday, July 23, 2024 12:44 AM IST
കൊച്ചി : സ്കൂട്ടറിൽ കാറ് ഇടിച്ച് കോളജ് വിദ്യാർഥിനിക്ക് ദാരുണാന്ത്യം. എറണാകുളം വാഴക്കുളം കുന്നുവഴിയിലുണ്ടായ അപകടത്തിൽ മാറമ്പിള്ളി എംഇഎസ് കോളേജിലെ ഫാഷൻ ഡിസൈനിംഗ് വിദ്യാർഥിനി റെയ്സ ഫാത്തിമ (20) ആണ് മരിച്ചത്.
കോളജ് വിട്ട് വിദ്യാർഥിനി വീട്ടിലേക്കു പോകുംവഴിയാണ് ദാരുണാപകടം ഉണ്ടായത്. റെയ്സ ഓടിച്ചു വന്ന സ്കൂട്ടറിൽ കാറ് ഇടിക്കുകയായിരുന്നു. അപകടത്തിൽ തെറിച്ച് റോഡിലേക്കു വീണ വിദ്യാർഥിനിയുടെ ശരീരത്തുകൂടി മറ്റൊരു പിക്കപ്പ് വാൻ കയറിയിറങ്ങി.
ഉടൻ തന്നെ ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചുവെങ്കിലും മരണം സംഭവിച്ചിരുന്നു. പോലീസും ഫയർഫോഴ്സും സ്ഥലത്ത് എത്തി. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.