തെരുവുനായയുടെ ആക്രമണത്തിൽ വിദ്യാർഥിക്ക് പരിക്ക്
Monday, July 22, 2024 11:26 PM IST
ശ്രീകണ്ഠപുരം: തെരുവുനായയുടെ ആക്രമണത്തിൽ വിദ്യാർഥിക്ക് പരിക്ക്. മടമ്പം മേരിലാൻഡ് ഹൈസ്കൂൾ അഞ്ചാംക്ലാസ് വിദ്യാർഥി കോട്ടൂർ വയലിലെ ജോസഫിന്റെ മകൻ ജയിനാണ് (ഒന്പത്) തെരുവുനായകളുടെ ആക്രമണത്തിൽ ഗുരുതരമായി പരിക്കേറ്റത്.
സ്കൂളിലേക്ക് പോകുന്പോഴായിരുന്നു സംഭവം. നിലവിളികേട്ടെത്തിയ നാട്ടുകാർ പരിക്കേറ്റ വിദ്യാർഥിയെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. അരക്കെട്ടിന് താഴെയും ഇരുകാലുകളിലും തുടകളിലും നായകൾ കടിച്ചുകീറിയിട്ടുണ്ട്.
ആറു നായകളാണ് ജയിനിനെ വളഞ്ഞിട്ട് ആക്രമിച്ചത്. വിദ്യാർഥിയെ അടിയന്തര ശസ്ത്രക്രിയയ്ക്ക് വിധേയമാക്കി.