ചടയമംഗലത്ത് പോലീസ് ആളുമാറി ദമ്പതികളെ മർദിച്ചതായി പരാതി
Monday, July 22, 2024 12:59 PM IST
കൊല്ലം: ചടയമംഗലത്ത് പോലീസ് ആളുമാറി ദമ്പതികളെ മർദിച്ചതായി പരാതി. ചടയമംഗലം സ്വദേശികളായ സുരേഷ് ഭാര്യ ബിന്ദു എന്നിവർക്കാണ് മർദനമേറ്റത്. സംഭവത്തിൽ കാട്ടാക്കട എസ്ഐ മനോജ് ഉൾപ്പെടെയുള്ള പോലീസുകാർക്കെതിരെ ദമ്പതികൾ കൊല്ലം റൂറൽ എസ്പിക്ക് പരാതി നൽകി.
പ്രതിയെ തേടിയെത്തിയതായിരുന്നു കാട്ടാക്കട എസ്ഐയും സംഘവും. കഴിഞ്ഞദിവസം രാത്രി വീട്ടിലെത്തിയ പോലീസ് സംഘം സുരേഷിനെ മർദിക്കുകയായിരുന്നു.
പരാതിയുടെ അടിസ്ഥാനത്തിൽ കൊല്ലം റൂറൽ എസ്പി അന്വേഷണത്തിന് ഉത്തരവിട്ടു. കൊട്ടാരക്കര ഡിവൈഎസ്പിക്കാണ് അന്വേഷണ ചുമതല. ഡിവൈഎസ്പിയുടെ റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കും.