നിപ്പ: വിദ്യാർഥി ഗുരുതരാവസ്ഥയിൽ; മൂന്നുപേർ നിരീക്ഷണത്തിൽ
Saturday, July 20, 2024 11:26 AM IST
കോഴിക്കോട്: നിപ്പ രോഗബാധയെന്ന് സംശയത്തെ തുടർന്ന് കോഴിക്കോട്ടെ സ്വകാര്യ ആശുപത്രിയിൽ പ്രവേശിപ്പിച്ച പതിനാലുകാരന് ഗുരുതരാവസ്ഥയിലെന്ന് റിപ്പോർട്ട്. പെരിന്തല്മണ്ണ സ്വദേശിയായ കുട്ടിയാണ് ചികിത്സയിലുള്ളത്.
കുട്ടിയുമായി സമ്പര്ക്കത്തിലേർപ്പെട്ട മൂന്ന് പേര് നീരീക്ഷണത്തിലാണ്. നിപ്പ പ്രോട്ടോക്കോള് പാലിക്കാന് ആരോഗ്യവകുപ്പ് ഇർക്ക് നിര്ദേശം നല്കി. വെള്ളിയാഴ്ച രാത്രിയിലാണ് കുട്ടിയെ ആശുപത്രിയിൽ എത്തിച്ചത്.
പരിശോധനയിൽ ആദ്യ സാമ്പിൾ പോസിറ്റീവ് ആയിരുന്നു. തുടർന്ന് മെഡിക്കൽ കോളജിലേക്ക് അയച്ച സാമ്പിളും പോസിറ്റീവായി. അന്തിമ ഫലത്തിനായി സ്രവ സാമ്പിള് ഉടൻ പൂനെയിലേക്ക് അയയ്ക്കുമെന്ന് ഡോക്ടര്മാര് പറഞ്ഞു.
നിപ്പ രോഗബാധ സംശയിക്കുന്ന പശ്ചാത്തലത്തില് മന്ത്രി വീണാ ജോര്ജ് അടിയന്തര യോഗം വിളിച്ചു. ഇന്ന് രാവിലെ കോഴിക്കോട്ടാണ് യോഗം ചേരുക. ആശങ്കപ്പെടേണ്ട സാഹചര്യമില്ലെന്നും ജാഗ്രത പാലിച്ചാൽ മതിയെന്നും ആരോഗ്യമന്ത്രി നിർദേശം നൽകി.