യുവാവിനെ പുഴയിൽ ഒഴുക്കിൽ പെട്ട് കാണാതായി
Monday, July 15, 2024 9:14 PM IST
പാലക്കാട്: പുഴയിൽ നാളികേരം പെറുക്കാൻ ഇറങ്ങിയ യുവാവിനെ ഒഴുക്കിൽ പെട്ട് കാണാതായി. പാലക്കാട് അയിലൂർ മുതുകുന്നി പുഴയിൽ ഇന്ന് ഉച്ചയ്ക്കാണ് സംഭവം.
ആണ്ടിത്തറ പുത്തൻ വീട്ടിൽ രാജേഷാണ് (42) ഒഴുക്കിൽ പെട്ടത്. രാജേഷിനെ കണ്ടെത്താൻ അഗ്നിരക്ഷാസേനയും ആലത്തൂർ പോലീസും തിരച്ചിൽ തുടരുകയാണ്.
വിദേശത്ത് നിന്ന് അവധിക്ക് നാട്ടിലെത്തിയതാണ് രാജേഷ്. നാളികേരം പെറുക്കാൻ സുഹൃത്തുക്കൾക്കൊപ്പം പോയി വരുന്നതിനിടെയാണ് ഒഴുക്കിൽ പെട്ടത്. ഒപ്പമുണ്ടായിരുന്നവർ രക്ഷപ്പെടുത്താൻ ശ്രമിച്ചുവെങ്കിലും സാധിച്ചില്ല.
പുഴയുടെ നല്ല ഒഴുക്കുള്ള ഭാഗത്തു വെച്ചാണ് രാജേഷിനെ കാണാതായിട്ടുള്ളതെന്ന് സുഹൃത്തുക്കൾ പറയുന്നു.