സ്നാപ്ചാറ്റ് ഡൗൺലോഡ് ചെയ്യുന്നത് വിലക്കി പിതാവ്; കൗമാരക്കാരി ജീവനൊടുക്കി
Monday, June 24, 2024 10:14 AM IST
ന്യൂഡൽഹി: മഹാരാഷ്ട്രയിലെ താനെയിൽ മൊബൈൽ ഫോണിൽ മെസേജിംഗ് ആപ്പ് ഡൗൺലോഡ് ചെയ്യരുതെന്ന് പിതാവ് ആവശ്യപ്പെട്ടതിനെത്തുടർന്ന് 16 കാരിയായ പെൺകുട്ടി ജീവനൊടുക്കി. ഡോംബിവലി മേഖലയിലെ നിൽജെയിൽ വെള്ളിയാഴ്ച രാത്രി നടന്ന സംഭവം ഇന്നാണ് പുറംലോകമറിയുന്നത്.
പെൺകുട്ടി മൊബൈൽ ഫോണിൽ സ്നാപ്ചാറ്റ് ആപ്ലിക്കേഷൻ ഡൗൺലോഡ് ചെയ്തിരുന്നു. ഇത് പിതാവ് വിലക്കിയതോടെ കുട്ടി കടുത്ത മാനസിക സമ്മർദത്തിലായി. വെള്ളിയാഴ്ച രാത്രി പെൺകുട്ടി തന്റെ വീട്ടിലെ കിടപ്പുമുറിയിൽ തൂങ്ങിമരിക്കുകയായിരുന്നു. ശനിയാഴ്ച വീട്ടുകാരാണ് കുട്ടിയെ മരിച്ച നിലയിൽ കണ്ടെത്തിയത്.
വിവരമറിയിച്ചതിനെ തുടർന്ന് പോലീസ് മൃതദേഹം പോസ്റ്റ്മോർട്ടത്തിന് അയച്ചതായും അസ്വാഭാവിക മരണത്തിന് കേസെടുത്തതായും മൻപാഡ പോലീസ് അറിയിച്ചു.