ജലപ്രതിസന്ധി: ഡല്ഹി മന്ത്രിയുടെ നിരാഹാരസമരം തുടങ്ങി
Friday, June 21, 2024 2:39 PM IST
ന്യൂഡല്ഹി: ഡല്ഹിയിലെ ജലപ്രതിസന്ധി പരിഹരിക്കണമെന്നാവശ്യപ്പെട്ടുള്ള ജലമന്ത്രി അതിഷിയുടെ നിരാഹാരസമരം ആരംഭിച്ചു. പ്രതിസന്ധി പരിഹരിക്കുന്നതുവരെ സമരം തുടരുമെന്ന് അതിഷി പറഞ്ഞു. ജംഗ്പുരയിലാണ് മന്ത്രി നിരാഹാരമിരിക്കുന്നത്.
ജലപ്രതിസന്ധി പരിഹരിക്കണമെന്നാവശ്യപ്പെട്ട് ബുധനാഴ്ച അതിഷി പ്രധാനമന്ത്രി നരേന്ദ്ര മോദിക്ക് കത്തെഴുതിയിരുന്നു. രണ്ട് ദിവസത്തിനുള്ളില് പരിഹാര നടപടികള് ഉണ്ടായില്ലെങ്കില് താന് നിരാഹാര സമരം ആരംഭിക്കുമെന്നും അവര് പറഞ്ഞിരുന്നു.
ഡല്ഹിക്ക് ന്യായമായി ലഭിക്കേണ്ട അളവ് ജലം ഹരിയാന സര്ക്കാര് നല്കാത്തതാണ് പ്രശ്നത്തിന് കാരണമെന്ന് മന്ത്രി പറഞ്ഞു. വളരെ കുറഞ്ഞ തോതില് മാത്രമാണ് തങ്ങള്ക്ക് ഹരിയാനയില് നിന്ന് ജലം ലഭിക്കുന്നതെന്നും അവര് അറിയിച്ചു. പലതവണ ഹരിയാന സര്ക്കാരിനോട് പറഞ്ഞിട്ടും അനുകൂലമായ തീരുമാനം ഉണ്ടായില്ല. ഡല്ഹി നിവാസികള് സമാനതകളില്ലാത്ത പ്രതിസന്ധിയാണ് നേരിടുന്നതെന്നും അവര് പ്രതികരിച്ചു.