ബാര് കോഴ ആരോപണം; ക്രൈംബ്രാഞ്ച് അനിമോന്റെ മൊഴിയെടുക്കുന്നു
Monday, May 27, 2024 12:35 PM IST
തിരുവനന്തപുരം: എല്ഡിഎഫ് സര്ക്കാരിനെതിരായ ബാര് കോഴ ആരോപണത്തില് ബാറുടമകളുടെ സംഘടനയുടെ മുന് നേതാവ് അനിമോന്റെ മൊഴിയെടുക്കുന്നു. തിരുവനന്തപുരത്തുനിന്നുള്ള ക്രൈംബ്രാഞ്ച് സംഘമാണ് മൊഴി രേഖപ്പെടുത്തുന്നത്. ക്രൈംബ്രാഞ്ച് ആവശ്യപ്പെട്ട സ്ഥലത്തേക്ക് അനിമോന് എത്തുകയായിരുന്നു.
സംസ്ഥാനത്തെ മദ്യനയത്തില് ഇളവ് പ്രഖ്യാപിക്കണമെങ്കില് ബാറുടമകള് കോഴ നല്കണമെന്ന തരത്തിലുള്ള ശബ്ദസന്ദേശമാണ് അനിമോന്റെ പേരില് നേരത്തേ പുറത്തുവന്നത്. രണ്ടര ലക്ഷം രൂപ വീതം നല്കണമെന്നും സംഘടനയുടെ സംസ്ഥാന പ്രസിഡന്റിന്റെ നിർദേശം അനുസരിച്ചാണ് പണപ്പിരിവെന്നുമായിരുന്നു ബാറുടമകളുടെ വാട്സാപ്പ് ഗ്രൂപ്പില് വന്ന സന്ദേശം.
എന്നാല് സംഭവം വിവാദമായതോടെ പണം പിരിക്കാന് ആവശ്യപ്പെട്ടത് സംഘടനയ്ക്ക് കെട്ടിടം വാങ്ങാനാണെന്ന വാദവുമായി അനിമോന് രംഗത്തെത്തിയിരുന്നു. തന്റെ ശബ്ദസന്ദേശം തെറ്റിദ്ധാരണ ഉണ്ടാക്കിയതില് ഇയാള് ഖേദപ്രകടനവും നടത്തിയിരുന്നു.