ഛത്തീസ്ഗഡിൽ ബിഎസ്എന്എല് മൊബൈല് ടവറുകള്ക്ക് മാവോയിസ്റ്റുകള് തീയിട്ടു
Monday, May 27, 2024 11:41 AM IST
റായ്പുര്: ഛത്തീസ്ഗഡിലെ നാരായണ്പുരില് മാവോയിസ്റ്റ് ആക്രമണം. നിര്മാണത്തിലിരുന്ന രണ്ട് മൊബൈല് ടവറുകള്ക്ക് തീയിട്ടു. ഗൗര്ദന്ദ്, ചമേലി ഗ്രാമങ്ങളില് നിര്മാണത്തിലിരിക്കുന്ന ബിഎസ്എന്എല് ടവറുകളാണ് നശിപ്പിച്ചത്. സംഭവത്തില് അന്വേഷണം ആരംഭിച്ചതായി ജില്ലാ പോലീസും ഐടിബിപിയും വ്യക്തമാക്കി.
മാവോയിസ്റ്റുകള്ക്ക് സ്വാധീനം കൂടുതലുള്ള ബസ്തര് മേഖലയിലാണ് സംഭവം. ഈ മേഖലയില് കഴിഞ്ഞ രണ്ട് മാസത്തിലേറെയായി സുരക്ഷാസേനയും മാവോയിസ്റ്റുകളും തമ്മില് നിരവധി ഏറ്റുമുട്ടലുകളുണ്ടായി.
നേരത്തെ, ബസ്തര് മേഖലയില് സ്ഥിതി ചെയ്യുന്ന കങ്കറില് നടന്ന ഏറ്റുമുട്ടലില് 29 നക്സലുകള് കൊല്ലപ്പെടുകയും മൂന്ന് സുരക്ഷാ ഉദ്യോഗസ്ഥര്ക്ക് പരിക്കേല്ക്കുകയും ചെയ്തിരുന്നു. ഈ മാസം 25ന് ബീജാപൂരിലെ ജപ്പേമര്ക, കാംകനാര് വനത്തില് സുരക്ഷാ സേനയുമായുള്ള ഏറ്റുമുട്ടലില് രണ്ട് നക്സലൈറ്റുകള് കൊല്ലപ്പെട്ടിരുന്നു.