ഡോ.കെ.പി.യോഹന്നാന്റെ സംസ്കാരം ചൊവ്വാഴ്ച; പൊതുദർശനം തുടരുന്നു
Monday, May 20, 2024 8:26 PM IST
തിരുവല്ല: അമേരിക്കയിലെ ഡാളസില് വച്ചുണ്ടായ വാഹനാപകടത്തില് മരിച്ച ഡോ.കെ.പി.യോഹന്നാന്റെ മൃതദേഹം നാളെ രാവിലെ പത്തിന് തിരുവല്ലയിലെ ബിലീവേഴ്സ് കത്തീഡ്രലിൽ സംസ്കരിക്കും.
തിരുവല്ലയിലെ ബിലീവേഴ്സ് കൺവൻഷൻ സെന്ററിൽ പൊതുദർശനത്തിന് വച്ച മൃതദേഹത്തിൽ സമൂഹത്തിന്റെ നാനാതുറകളിലുള്ളവർ അന്ത്യാഞ്ജലി അർപ്പിച്ചു.
ഗവർണർ ആരിഫ് മുഹമ്മദ് ഖാൻ, മന്ത്രിമാരായ സജി ചെറിയാൻ വി.എൻ. വാസവൻ, ഗോവ ഗവർണർ പി. എസ്. ശ്രീധരൻപിള്ള, കെ.സി.വേണുഗോപാൽ എംപി, ആന്റോ ആന്റണി എംപി തുടങ്ങിയവർ അന്ത്യാഞ്ജലി അർപ്പിച്ചു.
ഇന്നലെ പുലര്ച്ചെ നെടുമ്പാശേരിയിൽ എത്തിച്ച മൃതദേഹം വിലാപയാത്രയായി ആലപ്പുഴ വഴിയാണ് സ്വദേശമായ നിരണത്തെത്തിയത്. ഹരിപ്പാട് നഗരസഭ കവാടത്തില് ചെയര്മാന് കെ.കെ.രാമകൃഷ്ണന്റെ നേതൃത്വത്തില് അന്തിമോപചാരം അര്പ്പിച്ചു.
പത്തനംതിട്ട ജില്ലാ അതിര്ത്തിയായ വീയപുരത്ത് മാത്യു ടി.തോമസ് എംഎല്എയുടെ നേതൃത്വത്തില് മൃതദേഹം ഏറ്റുവാങ്ങി. തുടർന്ന് തിരുവല്ലയിലെ ബിലീവേഴ്സ് കൺവൻഷൻ സെന്ററിൽ പൊതുദർശനത്തിനുവച്ചു.
നാളെ രാവിലെ ഒന്പതുവരെ പൊതുദർശനം തുടരും. തുടർന്ന് സംസ്കാര ശുശ്രൂഷയുടെ ഏഴാംഘട്ടം ആരംഭിക്കും. പത്തിന് ബിലീവേഴ്സ് കത്തീഡ്രലിലേക്ക് ഭൗതികശരീരം എത്തിക്കും. പതിനൊന്നോടെ സംസ്കാര ചടങ്ങുകൾ പൂർത്തിയാകും.