ദുഃഖവേളയില് ഇന്ത്യ ഇറാനൊപ്പം നില്ക്കുന്നു; അനുശോചിച്ച് പ്രധാനമന്ത്രി
Monday, May 20, 2024 10:59 AM IST
ന്യൂഡൽഹി: ഹെലികോപ്റ്റർ അപകടത്തിൽ ഇറാൻ പ്രസിഡന്റ് ഇബ്രാഹിം റെയ്സി മരിച്ച സംഭവത്തിൽ അനുശോചനം രേഖപ്പെടുത്തി പ്രധാനമന്ത്രി നരേന്ദ്രമോദി. മരണം ഞെട്ടിക്കുന്നതും അതീവ ദുഖകരവുമാണെന്ന് മോദി എക്സില് കുറിച്ചു. ദുഃഖവേളയില് ഇന്ത്യ ഇറാനൊപ്പം നില്ക്കുന്നു.
ഇന്ത്യ-ഇറാന് ഉഭയകക്ഷി ബന്ധം ശക്തിപ്പെടുത്തുന്നതിന് അദ്ദേഹം നല്കിയ സംഭാവനകള് എന്നും സ്മരിക്കപ്പെടും. റെയ്സിയുടെ കുടുംബാംഗങ്ങളോടും ഇറാന് ജനതയോടും അനുശോചനം അറിയിക്കുന്നതായും പ്രധാനമന്ത്രി വ്യക്തമാക്കി.
ഹെലികോപ്റ്റർ അപകടത്തിൽപ്പെട്ട ഇറാൻ പ്രസിഡന്റ് ഇബ്രാഹിം റെയ്സിയും വിദേശകാര്യമന്ത്രി അമീര് ഹുസൈനും അടക്കമുള്ളവർ മരിച്ചെന്ന് ഇന്ന് രാവിലെയാണ് ഇറാൻ സ്ഥിരീകരിച്ചത്. തകർന്ന കോപ്റ്ററിന് സമീപമെത്തിയ രക്ഷാപ്രവര്ത്തകര്ക്ക് ജീവനോടെ ആരെയും കണ്ടെത്താനായില്ല.
കോപ്റ്റർ പൂർണമായും കത്തിയ നിലയിലാണ്. രക്ഷാപ്രവർത്തനത്തിനെത്തിയ തുർക്കിയുടെ ഡ്രോണാണ് തകർന്ന കോപ്റ്ററുണ്ടായിരുന്ന സ്ഥലം കണ്ടെത്തിയത്.