ഇറാൻ പ്രസിഡന്റ് ഇബ്രാഹിം റൈസി സഞ്ചരിച്ച ഹെലികോപ്റ്റർ അപകടത്തിൽപ്പെട്ടു
Sunday, May 19, 2024 7:08 PM IST
ടെഹ്റാൻ: ഇറാൻ പ്രസിഡന്റ് ഇബ്രാഹിം റെയ്സി സഞ്ചരിച്ച ഹെലികോപ്റ്റർ അപകടത്തിൽപ്പെട്ടു. അസർബൈജാൻ അതിർത്തിക്ക് സമീപം ജോൽഫ നഗരത്തിലാണ് അപകടമുണ്ടായത്.
മോശം കാലാവസ്ഥ കാരണം ഹെലികോപ്റ്റർ തിരിച്ചിറക്കിയെന്ന് ഇറാൻ വാർത്താ ഏജൻസി അറിയിച്ചു. വിദേശകാര്യ മന്ത്രി ഹുസൈൻ ആമിർ അബ്ദുല്ലാഹിയാനും കിഴക്കൻ അസർബൈജാൻ പ്രവിശ്യയുടെ ഗവർണറും മറ്റ് ഉദ്യോഗസ്ഥരുമാണ് ഹെലികോപ്റ്ററിൽ ഉണ്ടായിരുന്നത്.
ഹെലികോപ്റ്ററിൽ ഉണ്ടായിരുന്നവരുമായി ആശയവിനിമയം സാധ്യമായതായും ഇറാൻ ഭരണകൂടം അറിയിച്ചു. തലസ്ഥാനമായ ടെഹ്റാനിൽ നിന്ന് 600 കിലോമീറ്റർ അകലെയുള്ള അപകട സ്ഥലത്തേക്ക് രക്ഷാപ്രവർത്തകർ പുറപ്പെട്ടു.
കനത്ത മഴയും മൂടൽമഞ്ഞും രക്ഷാപ്രവർത്തകർക്ക് തടസം സൃഷ്ടിക്കുന്നതായും റിപ്പോർട്ടുണ്ട്. അസർബൈജാൻ പ്രസിഡന്റ് ഇൽഹാം അൽയേവിയുമായി ചേർന്ന് അണക്കെട്ട് ഉദ്ഘാടനം ചെയ്യാനാണ് ഞായറാഴ്ച പുലർച്ചെ ഇബ്രാഹിം റൈസി അസർബൈജാനിൽ എത്തിയത്.