അതിതീവ്രമഴയ്ക്ക് സാധ്യത; ഇടുക്കിയിലെ മലയോര മേഖലകളിൽ രാത്രിയാത്രാ നിരോധനം
Sunday, May 19, 2024 11:17 AM IST
ഇടുക്കി: ഇടുക്കിയിലെ മലയോര മേഖലകളിൽ രാത്രിയാത്ര നിരോധിച്ചു. ജില്ലയിൽ ഇന്നും തിങ്കളാഴ്ചയും റെഡ് അലർട്ട് നിലനിൽക്കുന്നതിനാലും കനത്ത മഴ പെയ്യുന്ന സാഹചര്യത്തിലും, ഉരുൾപൊട്ടൽ, മണ്ണിടിച്ചൽ സാധ്യത കണക്കിലെടുത്തുമാണ് ഇന്നുമുതൽ രാത്രി ഏഴുമുതൽ രാവിലെ ആറുവരെ മലയോരമേഖലകളിൽ രാത്രി യാത്ര നിരോധിച്ചത്. അതിശക്ത മഴ മുന്നറിയിപ്പ് പിൻവലിക്കുന്നത് വരെയാണ് നിയന്ത്രണം.
വിനോദസഞ്ചാര കേന്ദ്രങ്ങളിലും നിയന്ത്രണം ഏർപ്പെടുത്തിയിട്ടുണ്ട്. വിനോദസഞ്ചാരികൾ ഉൾപ്പെടെയുള്ള യാത്രക്കാർ രാത്രി യാത്ര ഒഴിവാക്കേണ്ടതാണെന്നും ജില്ലാ ഭരണകൂടം നിർദേശം നല്കി.
ജില്ലയിൽ അതിതീവ്രമഴയ്ക്ക് സാധ്യതയുള്ളതിനാലും റെഡ് അലർട്ട് പ്രഖ്യാപിച്ചിരിക്കുന്നതിനാലും ഇന്നും തിങ്കളാഴ്ചയും കൊളുക്കുമല ജീപ്പ് സഫാരി ഉണ്ടായിരിക്കുന്നതല്ല.
ഉരുൾപൊട്ടൽ, മണ്ണിടിച്ചിൽ സാധ്യതകൾ കണക്കിലെടുത്ത് ജില്ലയിലെ ക്വാറിയിംഗ്, മൈനിംഗ് പ്രവർത്തനങ്ങൾ റെഡ് അലർട്ട് പിൻവലിക്കുന്നത് വരെ നിരോധിച്ചു.