പന്തീരാങ്കാവ് കേസ്: രാഹുലിന്റെ കാർ കസ്റ്റഡിയിലെടുത്തു; സീറ്റിൽ രക്തക്കറ
Sunday, May 19, 2024 9:36 AM IST
കോഴിക്കോട്: പന്തീരാങ്കാവ് ഗാർഹിക പീഡന കേസിലെ പ്രതി രാഹുലിന്റെ കാർ അന്വേഷണ സംഘം കസ്റ്റഡിയിലെടുത്തു. കാറിന്റെ സീറ്റിൽ രക്തക്കറ കണ്ടെത്തിയതിനെ തുടർന്ന് ഫോറൻസിക് സംഘം വിശദമായ പരിശോധന നടത്തും.
ഇതിനിടെ, പ്രതി രാഹുലിനെ രാജ്യം വിടാൻ സഹായിച്ച പന്തീരാങ്കാവ് സ്റ്റേഷനിലെ സീനിയർ സിവിൽ പോലീസ് ഓഫീസർ ശരത് ലാലിനെ സസ്പെൻഡ്ചെയ്തിട്ടുണ്ട്. കേസിൽ വധശ്രമകുറ്റം അടക്കം ചുമത്താനുള്ള നീക്കം ഇയാൾ പ്രതിക്ക് ചോർത്തി നൽകിയെന്നാണ് വിവരം. കേസുമായി ബന്ധപ്പെട്ട് കഴിഞ്ഞ ദിവസം അറസ്റ്റിലായ രാജേഷിന്റെ അടുത്ത സുഹൃത്താണ് ശരത്.
പിടിക്കപ്പെടാതെ ചെക്പോസ്റ്റ് കടന്ന് ബംഗളൂരുവില് എത്താനുള്ള മാര്ഗങ്ങള് രാഹുലിന് പറഞ്ഞുകൊടുത്തത് പന്തീരാങ്കാവ് പോലീസ് സ്റ്റേഷനിലെ ഉദ്യോഗസ്ഥനാണെന്ന് നേരത്തെ കണ്ടെത്തിയിരുന്നു.
ഇക്കാര്യം ശ്രദ്ധയില്പ്പെട്ട അന്വേഷണ ഉദ്യോഗസ്ഥര് ഇയാള്ക്കെതിരേ അന്വേഷണത്തിന് നിര്ദേശം നല്കുകയായിരുന്നു. ഇയാളുടെ കോള് റെക്കോര്ഡുകള് അടക്കം പരിശോധിക്കാനും നിർദേശം നൽകിയിരുന്നു. രാഹുലിന്റെ സുഹൃത്ത് രാജേഷും ആരോപണവിധേയനായ പോലീസുകാരനും തമ്മില് പണമിടപാട് നടന്നതായും അന്വേഷണസംഘത്തിന് വിവരം ലഭിച്ചു.
അതേസമയം, ജര്മനിയിലേക്കു കടന്ന പ്രതിയെ നാട്ടിലേക്കു കൊണ്ടുവരുന്നതിന് അന്വേഷണസംഘം കേന്ദ്രത്തെ സമീപിക്കും. കേന്ദ്ര ആഭ്യന്തര മന്ത്രാലയത്തിന്റെയും വിദേശകാര്യ മന്ത്രാലയത്തിന്റെയും സഹായം തേടാനാണ് അന്വേഷണസംഘം ആലോചിക്കുന്നത്.
രാജ്യാന്തര അന്വേഷണ ഏജന്സിയായ ഇന്റര്പോള് മുഖേന ഇയാളെ തിരികെ കൊണ്ടുവരുന്നതിനു ബ്ളൂ കോര്ണര് നോട്ടീസ് പുറപ്പെടുവിച്ചതിനു പിന്നലെയാണ് കേന്ദ്രത്തെ സമീപിക്കുന്നത്. ബ്ളൂ കോര്ണര് നോട്ടീസില് മറുപടി ലഭിച്ചശേഷമായിരിക്കും അനന്തര നടപടികള്.
അതേസമയം ചോദ്യം ചെയ്യലിനു ഹാജരാകാന് നോട്ടീസ് കിട്ടിയശേഷം രാഹുലിന്റെ അമ്മയും സഹോദരിയും മെഡിക്കല്കോളജ് ആശുപത്രിയില് അഡ്മിറ്റാണ്. ആശുപത്രിയില് എത്തി ഇവരില്നിന്ന് മൊഴിയെടുക്കുന്ന കാര്യം അന്വേഷണസംഘം പരിഗണിക്കുന്നുണ്ട്. യുവതിയെ ഉപദ്രവിച്ച സംഭവത്തില് തങ്ങൾക്ക് പങ്കില്ലെന്നു കാണിച്ച് ഇരുവരും മുന്കൂര് ജാമ്യാപേക്ഷ നല്കിയിട്ടുണ്ട്.
രാഹുല് ജര്മന് പൗരനാണെന്നു പ്രചരിപ്പിച്ചതു മനഃപൂര്വമാണെന്ന് അന്വേഷണസംഘം കണ്ടെത്തിയിട്ടുണ്ട്. ഇയാള്ക്ക് ഇന്ത്യന് പാസ്പോര്ട്ടാണുള്ളതെന്ന് വ്യക്തമായിട്ടുണ്ട്.