ശുദ്ധജല കണക്ഷൻ മീറ്റര് മോഷണം; പ്രതികൾ പിടിയിൽ
Sunday, May 19, 2024 7:17 AM IST
കൊല്ലം: ആളില്ലാത്ത വീട്ടിൽ കയറി ശുദ്ധജല കണക്ഷൻ മീറ്റര് മോഷ്ടിക്കുന്ന സംഘത്തിലെ രണ്ടുപേര് പിടിയിൽ. കണ്ണനല്ലൂര് തടത്തില് വീട്ടില് സിറാജുദീന്(63), കണ്ണനല്ലൂര് വയലില് പുത്തന്വീട്ടില് നാസര്(44) എന്നിവരാണ് പിടിയിലായത്.
ആക്രി സാധനങ്ങൾ എടുക്കാൻ എന്ന വ്യാജേനയാണ് ഇവർ വീടുകളിൽ എത്തിയിരുന്നത്. തുടർന്ന് വീട്ടിൽ ആളില്ലെന്ന് ഉറപ്പുവരുത്തിയ ശേഷം മീറ്റർ മോഷ്ടിച്ച് കടന്നുകളയലാണ് രീതി.
വെളിനല്ലൂര് സുരേഷ് ഭവനില് സുരേഷ് കുമാറിന്റെ വീട്ടിലെ വാട്ടര്മീറ്റർ മോഷണത്തിനിടെയാണ് പ്രതികൾ പിടിയിലായത്. ഇവർ മീറ്റര് മോഷ്ടിച്ച് ചാക്കില് ആക്കി വാഹനം ഓടിച്ചു പോകുകയായിരുന്നു.
തുടർന്ന് സുരേഷിന്റെ മകന് സംശയംതോന്നിയതോടെ വാര്ഡ് മെമ്പറെ വിവരം അറിയിച്ചു. പിന്നാലെ വാഹനം തടഞ്ഞുനിർത്തിയ നടത്തിയ പരിശോധനയിലാണ് പ്രതികൾ പിടിയിലായത്.