ബംഗളൂരു പ്ലേ ഓഫിൽ; ചെന്നൈ പുറത്ത്
Sunday, May 19, 2024 12:27 AM IST
ബംഗളൂരു: നിര്ണായക മത്സരത്തില് ചെന്നൈയെ 27 റൺസിന് പരാജയപ്പെടുത്തി ബംഗളൂരു റോയല് ചലഞ്ചേഴ്സ് ഐപിഎൽ പ്ലേ ഓഫിൽ. സ്കോർ: ബംഗളൂരു 218/5 ചെന്നൈ 197/7. ബംഗളൂരു ചിന്നസ്വാമി സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ ആര്സിബി നിശ്ചിത ഓവറിൽ അഞ്ചു വിക്കറ്റ് നഷ്ടത്തിൽ 218 റൺസ് നേടി.
ഫാഫ് ഡു പ്ലെസിസ് (39 പന്തില് 54), വിരാട് കോഹ്ലി (29 പന്തില് 47), രജത് പടിധാര് (23 പന്തില് 41), കാമറൂണ് ഗ്രീന് (17 പന്തില് 38) എന്നിവരുടെ മികച്ച പ്രകടനമാണ് ആര്സിബിയെ കൂറ്റന് സ്കോറിലേക്ക് നയിച്ചത്.
മറുപടി ബാറ്റിംഗ് ആരംഭിച്ച ചെന്നൈക്ക് നിശ്ചിത ഓവറിൽ 197 റൺസ്മാത്രമെ നേടാൻ കഴിഞ്ഞൊള്ളു. ചെന്നൈയെ 201 ന് താഴെയുള്ള സ്കോറില് ഒതുക്കിയാല് മാത്രമെ ആര്സിബിക്ക് പ്ലേ ഓഫിലെത്താന് സാധിക്കൂ എന്നതിനാൽ ബംഗളൂരു ബോളേഴ്സിന്റെ കൃത്യതയാർന്ന ബോളിനു മുന്നിൽ പിടിച്ചു നിൽക്കാൻ സിഎസ്കെ താരങ്ങൾക്കായില്ല.
രചിൻ രവീന്ദ്ര (37 പന്തില് 61), രഹാനെ (22 പന്തില് 33) രവീന്ദ്ര ജഡേജ (22 പന്തിൽ 42), എം.എസ്. ധോണി (13 പന്തില് 25) എന്നിവർ മികച്ച പ്രകടനം പുറത്തെടുത്തെങ്കിലും ടീമിന്റെ പ്ലേ ഓഫ് ബർത്ത് ഉറപ്പിക്കാനായില്ല.
കോല്ക്കത്ത നൈറ്റ് റൈഡേഴ്സ്, രാജസ്ഥാന് റോയല്സ്, സണ്റൈസേഴ്സ് ഹൈദരാബാദ് എന്നീ ടീമുകൾ നേരത്തെ തന്നെ പ്ലേ ഓഫ് ഉറപ്പാക്കിയിരുന്നു.