ഹോട്ടല്‍ ജീവനക്കാരുമായി സംഘര്‍ഷം; നാല് എയര്‍ഫോഴ്‌സ് ഉദ്യോഗസ്ഥര്ക്കെതിരേ കേസ്
Thursday, May 16, 2024 12:51 PM IST
തിരുവനന്തപുരം: തലസ്ഥാനത്ത് ഹോട്ടല്‍ ജീവനക്കാരും എയര്‍ഫോഴ്‌സ് ഉദ്യോഗസ്ഥരും തമ്മില്‍ സംഘര്‍ഷം. സംഭവത്തില്‍ നാല് എയര്‍ഫോഴ്‌സ് ഉദ്യോഗസ്ഥര്ക്കെതിരേ പോലീസ് കേസെടുത്തു. എയര്‍ഫോഴ്‌സിന്‍റെ ആക്കുളം യൂണിറ്റിലെ ഉദ്യോഗസ്ഥര്ക്കെതിരെയാണ് കേസ്.
ബുധനാഴ്ച അര്‍ധരാത്രി വെണ്‍പാലവട്ടത്തെ എംപീരിയല്‍ കിച്ചണ്‍ എന്ന ഹോട്ടലിലാണ് സംഭവം. രാത്രി വൈകി 18 പേരടങ്ങുന്ന എയര്‍ഫോഴ്‌സ് ഉദ്യോഗസ്ഥരുടെ സംഘം ഹോട്ടലില്‍ എത്തുകയായിരുന്നു.
ഇവിടെ എത്തിയതിന് പിന്നാലെ തങ്ങള്‍ക്ക് ഇരിക്കാന്‍ സീറ്റ് വേണമെന്ന് ഇവര്‍ ആവശ്യപ്പെട്ടു. സീറ്റ് ഒഴിവില്ലാത്തതിനാല്‍ കാത്തിരിക്കാന്‍ ഹോട്ടല്‍ ജീവനക്കാര്‍ അറിയിച്ചു
എന്നാല്‍ സീറ്റ് അപ്പോള്‍ തന്നെ വേണമെന്ന് ആവശ്യപ്പെട്ട് ഇവര്‍ ബഹളം വച്ചതോടെ ഇരുകൂട്ടരും തമ്മില്‍ സംഘര്‍ഷമുണ്ടായി. ഹോട്ടല്‍ മാനേജ്‌മെന്‍റ് നല്‍കിയ പരാതിയുടെ അടിസ്ഥാനത്തിലാണ് ഉദ്യോഗസ്ഥര്ക്കെതിരേ കേസെടുത്തത്.