കൽക്കട്ട ഹൈക്കോടതിയിലെ ജഡ്ജി സ്ഥാനം രാജിവച്ചു; ബിജെപിയില് ചേരുമെന്ന് പ്രഖ്യാപനം
Tuesday, March 5, 2024 3:37 PM IST
കോല്ക്കത്ത: കൽക്കട്ട ഹൈക്കോടതി ജഡ്ജി അഭിജിത് ഗംഗോപാധ്യായ സ്ഥാനം രാജിവച്ചു. ബിജെപിയില് ചേരുന്നതിന് മുന്നോടിയായാണ് തീരുമാനം.
ഇന്ന് രാവിലെ രാജിക്കത്ത് രാഷ്ട്രപതിക്കും ചീഫ് ജസ്റ്റീനും കൈമാറിയ ശേഷമാണ് രാഷ്ട്രീയ പ്രവേശനത്തിന്റെ കാര്യം പ്രഖ്യാപിച്ചത്. വ്യാഴാഴ്ചയാകും ബിജെപിയില് ചേരുക. താന് ലോക്സഭാ തെരഞ്ഞെടുപ്പില് മത്സരിക്കണോ എന്ന കാര്യത്തില് തീരുമാനമെടുക്കേണ്ടത് ബിജെപിയാണെന്നും മാധ്യമപ്രവര്ത്തകരുടെ ചോദ്യങ്ങളോട് അദ്ദേഹം പ്രതികരിച്ചു.
തൃണമൂല് കോണ്ഗ്രസിനെതിരായ പല കേസുകളിലും വിധി പറഞ്ഞിട്ടുള്ള ജഡ്ജിയാണ് ഗംഗോപാധ്യായ. ഇതിന് പിന്നാലെ തൃണമൂല് നേതാക്കളുമായി പലതവണ വാക്പോരുണ്ടായിട്ടുണ്ട്. സ്ഥാനം രാജിവച്ച് ഗംഗോപാധ്യായ രാഷ്ട്രീയത്തിലിറങ്ങാനുള്ള നീക്കമാണ് നടത്തുന്നതെന്ന് അടക്കം തൃണമൂല് വിമര്ശനം ഉന്നയിച്ചിരുന്നു.