യുവതിയെ തീ കൊളുത്തി കൊല്ലാൻ ശ്രമം; പൊള്ളലേറ്റ പ്രതി കിണറ്റില് ചാടി
Monday, March 4, 2024 10:29 PM IST
തിരുവനന്തപുരം: യുവതിയെ വീട്ടിൽ നിന്ന് വിളിച്ചിറക്കി സുഹൃത്ത് തീ കൊളുത്തി കൊല്ലാൻ ശ്രമിച്ചു. തിരുവനന്തപുരം പൗഡിക്കോണത്തുണ്ടായ സംഭവത്തിൽ ചേങ്കോട്ടുകോണം സ്വദേശിനി ജി.സരിതയ്ക്കു ഗുരുതരമായി പരിക്കേറ്റു.
തിങ്കളാഴ്ച രാത്രി എട്ടിന് സരിതയുടെ വീട്ടിലെത്തിയ സുഹൃത്തായ ബിനു വാക്കുതർക്കത്തിനിടെ കൈയിൽ കരുതിയിരുന്ന പെട്രോൾ യുവതിയുടെ ദേഹത്ത് ഒഴിച്ചു കത്തിക്കുകയായിരുന്നു. തുടർന്ന് തീ ബിനുവിന്റെ ശരീരത്തിലേക്ക് പടർന്നതോടെ ഇയാൾ സമീപത്തെ കിണറ്റിലേക്ക് ചാടുകയായിരുന്നു.
കഴക്കൂട്ടത്തുനിന്നെത്തിയ അഗ്നിശമന സേനാംഗങ്ങൾ കിണറ്റിലിറങ്ങിയാണ് ബിനുവിനെ രക്ഷിച്ചത്. പോത്തൻകോട് പോലീസ് കേസെടുത്തു. ഇയാളുടെ സ്കൂട്ടറിൽ നിന്നും വെട്ടുകത്തിയും മുളകുപൊടിയും കണ്ടെടുത്തതായി പോലീസ് പറഞ്ഞു.