സിദ്ധാര്ഥന്റെ മരണം; പ്രതികളെ കാമ്പസിലെത്തിച്ച് തെളിവെടുത്തു
Monday, March 4, 2024 10:20 AM IST
വയനാട്: പൂക്കോട് വെറ്റിനറി കോളജ് വിദ്യാര്ഥി സിദ്ധാര്ഥന്റെ മരണത്തില് പ്രതികളുമായി കാമ്പസില് തെളിവെടുപ്പ്. സിദ്ധാര്ഥനെ മര്ദിച്ച കുന്നിന്മുകളിലാണ് രഹന്, ആകാശ് എന്നീ പ്രതികളെ എത്തിച്ച് പോലീസ് തെളിവെടുപ്പ് നടത്തിയത്.
കല്പ്പറ്റ ഡിവൈഎസ്പിയുടെ നേതൃത്വത്തിലുള്ള സംഘമാണ് പ്രതികളെ തെളിവെടുപ്പിനെത്തിച്ചത്. കേസിലെ പ്രധാനപ്രതിയായ സിന്ജോ ജോണ്സനെ ഹോസ്റ്റലില് എത്തിച്ച് പോലീസ് ശനിയാഴ്ച തെളിവെടുപ്പ് നടത്തിയിരുന്നു.
ഹോസ്റ്റലിലെ ഇരുപത്തിയൊന്നാം നമ്പര് മുറിയിലും നടുത്തളത്തിലും ഉള്പ്പെടെയാണ് ഇയാളുമായി തെളിവെടുപ്പ് നടത്തിയത്. സിദ്ധാര്ഥനെ ആക്രമിക്കാൻ ഉപയോഗിച്ച ആയുധങ്ങള് അന്വേഷണ സംഘം കണ്ടെത്തിയിരുന്നു.
കഴിഞ്ഞ ഫെബ്രുവരി 18നാണ് സിദ്ധാര്ഥനെ ഹോസ്റ്റലിലെ ശുചിമുറിയിൽ തൂങ്ങിമരിച്ച നിലയിൽ കണ്ടെത്തിയത്. ഇതിന് മുൻപ് പ്രതികൾ അതിക്രൂരമായി സിദ്ധാര്ഥനെ മര്ദിച്ചുവെന്നും ആത്മഹത്യയിലേക്ക് എത്തിച്ചുവെന്നുമാണ് റിമാൻഡ് റിപ്പോര്ട്ടിൽ പറയുന്നത്.
സിദ്ധാർഥന്റെ മരണത്തിൽ കൊലപാതക സാധ്യത തള്ളാതെയാണു പോലീസിന്റെ റിമാൻഡ് റിപ്പോർട്ട്. ഹോസ്റ്റലിലെ അലിഖിത നിയമമനുസരിച്ച് സിദ്ധാർഥനെ പരസ്യ വിചാരണ നടത്തിയെന്നും ക്രൂരമർദനത്തിന് ഇരയാക്കിയെന്നും റിപ്പോർട്ടിൽ പറയുന്നു.