കോൺഗ്രസ് സ്ഥാനാർഥികളെ അറിയാൻ ഇനിയും കാക്കണം
Friday, March 1, 2024 9:21 PM IST
തിരുവനന്തപുരം: ലോക്സഭാ തെരഞ്ഞെടുപ്പിൽ ഇടതുമുന്നണി 20 സ്ഥാനാർഥികളെയും പ്രഖ്യാപിച്ച് പ്രചാരണ പ്രവർത്തനങ്ങൾ തുടങ്ങി ദിവസങ്ങൾ പിന്നിടുന്പോഴും കോൺഗ്രസ് മെല്ലേപ്പോക്കിൽ. കേരളത്തില് കോണ്ഗ്രസ് 16 മണ്ഡലങ്ങളിലാണ് മത്സരിക്കുന്നത്.
എന്നാൽ, ഒരു മണ്ഡലത്തിൽ പോലും ഔദ്യോഗികമായി സ്ഥാനാർഥികളെ പ്രഖ്യാപിക്കാൻ കോൺഗ്രസിന് ഇതുവരെ കഴിഞ്ഞിട്ടില്ല. എന്നാൽ യുഡിഎഫിലെ മറ്റു ഘടകക്ഷികളായ മുസ്ലീം ലീഗും കേരള കോൺഗ്രസും ആർഎസ്പിയും സ്ഥാനാർഥികളെ പ്രഖ്യാപിച്ചു.
ഇന്നലെ തിരുവനന്തപുരത്ത് ചേര്ന്ന സ്ക്രീനിംഗ് കമ്മിറ്റി തയാറാക്കി സമര്പ്പിച്ച കോൺഗ്രസിന്റെ സ്ഥാനാർഥി പട്ടികയിന്മേലുള്ള ചർച്ച ഡൽഹിയിൽ ഞായറാഴ്ച നടക്കും. അങ്ങനെയെങ്കിൽ തിങ്കളാഴ്ച ഒൗദ്യോഗിക പ്രഖ്യാപനം ഉണ്ടായേക്കുമെന്നു മാത്രമാണ് നിലവിലുള്ള സൂചന.
ഹരീഷ് ചൗധരിയുടെ അധ്യക്ഷതയില് ഇന്നലെ തിരുവനന്തപുരത്തു നടന്ന സ്ക്രീനിംഗ് കമ്മിറ്റിയില് രാഹുല് ഗാന്ധിയും കെ. സുധാകരനും അടക്കം 15 സിറ്റിംഗ് എംപിമാരുടെ പേർ സമര്പ്പിച്ചിരുന്നു. കേന്ദ്ര തെരഞ്ഞെടുപ്പ് സമിതിയാണ് പട്ടികയ്ക്ക് അന്തിമ അംഗീകാരം നല്കുക. അതിനുള്ള ചര്ച്ചകള്ക്കായി കെപിസിസി അധ്യക്ഷന് കെ. സുധാകരനും പ്രതിപക്ഷ നേതാവ് വി.ഡി. സതീശനും ഡല്ഹിയിലെത്തും.
കഴിഞ്ഞ തവണ കോണ്ഗ്രസ് വിജയിച്ച 15 മണ്ഡലങ്ങളിലേക്കും ഒറ്റപ്പേര് മാത്രമാണ് സമര്പ്പിച്ചിട്ടുള്ളത്. സിറ്റിംഗ് എംപിമാരെയെല്ലാം നിര്ത്താന് തീരുമാനിച്ച പശ്ചാത്തലത്തിലാണിത്. ആലപ്പുഴ സീറ്റില് മാത്രമാണ് സ്ഥാനാര്ഥികളെ സ്ക്രീനിംഗ് കമ്മിറ്റി നിര്ദേശിക്കാത്തത്.
ആലപ്പുഴയില് സ്ഥാനാര്ഥി തീരുമാനം ഹൈക്കമാന്ഡിന് വിട്ടിരിക്കുകയാണ്. വയനാട്ടില് രാഹുല്ഗാന്ധി വീണ്ടം മത്സരിച്ചാല് ആലപ്പുഴയില് കെ.സി. വേണുഗോപാല് മത്സരിക്കാന് സാധ്യത കുറവാണ്. കണ്ണൂരില് മത്സരത്തിനില്ലെന്ന് കെ.സുധാകരനും അറിയിച്ചിട്ടുണ്ട്. സുധാകരന്റെ ആവശ്യം അംഗീകരിച്ചാല് കണ്ണൂരില് പുതിയ സ്ഥാനാര്ഥി വരും.