ഹിമാചലില് കോണ്ഗ്രസിന് ആശ്വാസം; ബജറ്റ് പാസായി
Wednesday, February 28, 2024 5:18 PM IST
ഷിംല: ഹിമാചല്പ്രദേശിലെ വിമത നീക്കങ്ങള്ക്ക് പിന്നാലെ കോണ്ഗ്രസ് സര്ക്കാരിന് ആശ്വാസം. നിയമസഭയില് ബജറ്റ് പാസായി. 15 ബിജെപി എംഎല്എമാരെ സ്പീക്കര് സസ്പെന്ഡ് ചെയ്ത നടപടിയാണ് ബജറ്റ് പാസാകുന്നതിനു നിര്ണായകമായി മാറിയത്.
വിമത നീക്കം നടത്തിയ ആറ് കോണ്ഗ്രസ് എംഎല്എമാരെ അയോഗ്യരാക്കാനുള്ള നടപടി തുടരുന്നതായും സര്ക്കാരിനെ അട്ടിമറിക്കാനുള്ള ബിജെപി ഗൂഢാലോചന പൊളിഞ്ഞുവെന്നും മുഖ്യമന്ത്രി സുഖ്വിന്ദര് സിംഗ് സുഖു പറഞ്ഞു.
രാജ്യസഭാ തെരഞ്ഞെടുപ്പിനു പിന്നാലെ ഹിമാചൽ പ്രദേശിൽ രാഷ്ട്രീയ പ്രതിസന്ധി രൂക്ഷമാകുകയായിരുന്നു. നിയമസഭയിൽ വിശ്വാസ വോട്ടെടുപ്പ് നടത്തണമെന്ന് ആവശ്യപ്പെട്ട് പ്രതിപക്ഷ നേതാവും സംഘവും ഗവർണറെ കണ്ടതിനു പിന്നാലെയാണ് ബിജെപി എംഎൽഎമാരെ സസ്പെൻഡ് ചെയ്തത്.
ചൊവ്വാഴ്ച വോട്ടെടുപ്പിനിടെ നിയമസഭയില് പ്രതിപക്ഷം ബഹളം വച്ചിരുന്നു. ഇതിന്റെ പേരിലാണ് നടപടിയെന്നാണ് വിവരം. ആകെ 25 എംഎല്എമാരാണ് ഹിമാചല്പ്രദേശില് പ്രതിപക്ഷമായ ബിജെപിക്കുള്ളത്. 15 പേരെ സസ്പെന്ഡ് ചെയ്തതോടെ അംഗസംഖ്യ 10 ആയി. വിശ്വാസ വോട്ടെടുപ്പ് നടന്നാൽ 10 പേർക്കു മാത്രമേ ഇനി പങ്കെടുക്കാനാവൂ.
ഇതിനിടെ, കോൺഗ്രസിന് തിരിച്ചടിയായി ഒരു മന്ത്രിയും രാജിവച്ചിരുന്നു. വിക്രമാദിത്യ സിംഗ് ആണ് മന്ത്രി സ്ഥാനം രാജിവച്ചത്.
രാജ്യസഭാ തെരഞ്ഞെടുപ്പിൽ കോൺഗ്രസ് എംഎൽഎമാർ ക്രോസ് വോട്ട് ചെയ്തതോടെയാണ് മുഖ്യമന്ത്രി സുഖ്വിന്ദർ സിംഗ് സുഖുവിന്റെ നേതൃത്വത്തിലുള്ള സർക്കാരിനെതിരെ അവിശ്വാസ പ്രമേയം അവതരിപ്പിക്കാൻ ബിജെപി ഒരുങ്ങിയത്.