വനിതാ ഐപിഎൽ: മുംബൈ ഇന്ത്യൻസിന് രണ്ടാം വിജയം
Monday, February 26, 2024 12:15 AM IST
ബംഗളൂരു: വനിതാ പ്രീമിയർ ലീഗിൽ മുംബൈ ഇന്ത്യൻസിന് വിജയം. ഗുജറാത്ത് ജയന്റ്സിനെ അഞ്ചുവിക്കറ്റിന് പരാജയപ്പെടുത്തിയാണ് മുംബൈ തുടർച്ചയായ രണ്ടാം വിജയം നേടിയത്. ജയന്റ്സ് മുന്നോട്ടുവച്ച 127 റണ്സ് വിജയലക്ഷ്യം 18.1 ഓവറില് അഞ്ച് വിക്കറ്റ് നഷ്ടത്തിൽ മുംബൈ മറികടന്നു.
സ്കോർ: ഗുജറാത്ത് ജയന്റ്സ് 126/9. മുംബൈ ഇന്ത്യൻസ് 129/5 (18.1). ബംഗളൂരു ചിന്നസ്വാമി സ്റ്റേഡിയത്തില് ടോസ് നേടിയ മുംബൈ ഇന്ത്യന്സ് ആദ്യം ഫീല്ഡിംഗ് തെരഞ്ഞെടുക്കുകയായിരുന്നു.
മുംബൈ ക്യാപ്റ്റന് ഹര്മന്പ്രീത് കൗറിന്റെ തീരുമാനം ശരിവെക്കുന്ന വിധത്തിലായിരുന്നു ഗുജറാത്തിന്റെ തുടക്കം. ആദ്യ മൂന്ന് ഓവറിനുള്ളില് തന്നെ രണ്ട് വിക്കറ്റ് വീണു. വേദ കൃഷ്ണമൂര്ത്തിയെയും (0) ഹര്ലീന് ഡിയോളിനെയുമാണ് (8) ഗുജറാത്തിന് നഷ്ടമായത്.
ഇരുവരെയും വിക്കറ്റിന് മുന്നില് കുരുക്കി ഷബ്നിം ഇസ്മായില് മുംബൈയ്ക്ക് കാര്യങ്ങള് എളുപ്പമാക്കി. ഫോബ് ലിച്ച്ഫീല്ഡ് (7), ദയലന് ഹേമലത (3) എന്നിവരും അതിവേഗം മടങ്ങി.
ഒരുവശത്ത് വിക്കറ്റുകള് വീണുകൊണ്ടിരിക്കുമ്പോഴും ക്യാപ്റ്റന് ബെത് മൂണി 24 റണ്സുമായി ടീമിനെ മുന്നോട്ടു നയിച്ചു.മുംബൈയ്ക്ക് വേണ്ടി അമേലിയ കെര് നാലും ഷബ്നിം ഇസ്മായില് മൂന്നും വീതം വിക്കറ്റുകള് വീഴ്ത്തി.
മറുപടി ബാറ്റിംഗ് ആരംഭിച്ച മുംബൈയ്ക്ക് 21 റണ്സിന് ആദ്യവിക്കറ്റ് നഷ്ടമായി. പിന്നാലെ ക്യാപ്റ്റൻ ഹർമന്പ്രീത് കൗറിനൊപ്പം അമേല്യ കേറും (31) ചേർന്നതോടെ മുംബൈ വിജയ തീരത്തടുത്തു. മുപ്പത്തിയൊന്ന് റൺസും നാലു വിക്കറ്റും വീഴ്ത്തിയ അമേലിയ കേറിനെ കളിയിലെ താരമായി തെരഞ്ഞെടുത്തു.