രാജ്യസഭാ സീറ്റ് നല്കാമെന്ന നിര്ദേശമാണ് കോണ്ഗ്രസ് മുന്നോട്ട് വച്ചത്; സ്ഥിരീകരിച്ച് സുധാകരന്
Sunday, February 25, 2024 3:28 PM IST
കൊച്ചി: മുസ്ലീം ലീഗിന് രാജ്യസഭാ സീറ്റ് നല്കാമെന്ന നിര്ദേശമാണ് ഉഭയകക്ഷി ചര്ച്ചയില് കോണ്ഗ്രസ് മുന്നോട്ട് വച്ചതെന്ന് കെപിസിസി പ്രസിഡന്റ് കെ.സുധാകരന്. ചര്ച്ച ചെയ്ത ശേഷം ഇക്കാര്യത്തില് മറുപടി നല്കാമെന്ന് ലീഗ് അറിയിച്ചെന്നും സുധാകരന് പ്രതികരിച്ചു.
ലോക്സഭാ തെരഞ്ഞെടുപ്പില് ലീഗിന് മുന്നാം സീറ്റ് വേണമെന്ന ആവശ്യത്തില് ആലുവ ഗസ്റ്റ്ഹൗസില് നടന്ന ഉഭയകക്ഷി ചര്ച്ചയ്ക്ക് പിന്നാലെ പ്രതിപക്ഷ നേതാവ് വി.ഡി.സതീശനും ലീഗ് ദേശീയ ജനറൽ സെക്രട്ടറി പി.കെ.കുഞ്ഞാലിക്കുട്ടിയും മാധ്യമങ്ങളെ കണ്ടിരുന്നു. എന്നാല് ചര്ച്ചയിലെ തീരുമാനം എന്താണെന്ന് മാധ്യമങ്ങളോട് വെളിപ്പെടുത്താന് ഇവര് തയാറായിരുന്നില്ല.
ചർച്ച തൃപ്തികരമായിരുന്നെന്നായിരുന്നു യോഗത്തിന് ശേഷം കുഞ്ഞാലിക്കുട്ടി പ്രതികരിച്ചത്. ലീഗ് സംസ്ഥാന അധ്യക്ഷന് പാണക്കാട് സാദിഖലി ശിഹാബ് തങ്ങളെ ചര്ച്ചയുടെ വിശദാംശങ്ങള് ധരിപ്പിക്കും. പിന്നീട് ചര്ച്ചയില് ഉരുത്തിരിഞ്ഞ് വന്ന കാര്യങ്ങള് ചൊവ്വാഴ്ച ചേരുന്ന ലീഗ് യോഗം വിലയിരുത്തും. ഇതിന് ശേഷം തീരുമാനം അറിയിക്കാമെന്നും കുഞ്ഞാലിക്കുട്ടി പറഞ്ഞു.
ഉഭയകക്ഷി ചര്ച്ച പൂര്ത്തിയായെന്നും ഇരുകൂട്ടരും പാര്ട്ടി നേതൃത്വവുമായി ആലോചിച്ച ശേഷം ചൊവ്വാഴ്ചയോടെ അന്തിമ തീരുമാനമെടുക്കുമെന്നുമാണ് പ്രതിപക്ഷ നേതാവ് വി.ഡി.സതീശൻ പ്രതികരിച്ചത്. എന്നാല് ഒടുവില് മാധ്യമങ്ങളെ കണ്ട സുധാകരന് ചർച്ചയിലെ വിശദാംശങ്ങൾ വെളിപ്പെടുത്തുകയായിരുന്നു.