ലീഗിന് മൂന്നാം സീറ്റ് നൽകിയേക്കില്ല; പകരം രാജ്യസഭാ സീറ്റ് നല്കാമെന്ന് കോണ്ഗ്രസ് നിര്ദേശം
Sunday, February 25, 2024 2:03 PM IST
കൊച്ചി: ലോക്സഭാ തെരഞ്ഞെടുപ്പില് ലീഗിന് മൂന്നാം സീറ്റ് വേണമെന്ന ആവശ്യത്തില് ബുദ്ധിമുട്ടറിയിച്ച് കോണ്ഗ്രസ്. പകരം രാജ്യസഭാ സീറ്റ് നല്കാമെന്ന നിര്ദേശം ഉഭയകക്ഷി ചര്ച്ചയില് കോണ്ഗ്രസ് മുന്നോട്ട് വച്ചെന്നാണ് സൂചന. ഇക്കാര്യത്തില് ആലോചിച്ച് മറുപടി നല്കാമെന്ന് ലീഗ് നേതാക്കള് അറിയിക്കുകയും ചെയ്തെന്നാണ് വിവരം.
ചൊവ്വാഴ്ച പാണക്കാട് ചേരുന്ന ലീഗ് യോഗം ഇക്കാര്യം വിലയിരുത്തും. രാജ്യസഭാ സീറ്റ് നല്കാമെന്ന നിര്ദേശം ചര്ച്ചയില് മുന്നോട്ട് വച്ച കാര്യം കോണ്ഗ്രസ് എഐസിസി നേതൃത്വത്തെയും അറിയിക്കും.
എന്നാൽ ചർച്ച തൃപ്തികരമായിരുന്നെന്നായിരുന്നു ആലുവയിലെ ഗസ്റ്റ്ഹൗസിൽ ചേർന്ന യോഗത്തിന് ശേഷം കുഞ്ഞാലിക്കുട്ടി പ്രതികരിച്ചത്. ലീഗ് സംസ്ഥാന അധ്യക്ഷന് പാണക്കാട് സാദിഖലി ശിഹാബ് തങ്ങളെ ചര്ച്ചയുടെ വിശദാംശങ്ങള് ധരിപ്പിക്കും. പിന്നീട് ചര്ച്ചയില് ഉരുത്തിരിഞ്ഞ് വന്ന കാര്യങ്ങള് ചൊവ്വാഴ്ച ചേരുന്ന ലീഗ് യോഗം വിലയിരുത്തും. ഇതിന് ശേഷം തീരുമാനം അറിയിക്കാമെന്നും കുഞ്ഞാലിക്കുട്ടി പറഞ്ഞു.
ഉഭയകക്ഷി ചര്ച്ച പൂര്ത്തിയായെന്നും ഇരുകൂട്ടരും പാര്ട്ടി നേതൃത്വവുമായി ആലോചിച്ച ശേഷം ചൊവ്വാഴ്ചയോടെ അന്തിമ തീരുമാനമെടുക്കുമെന്നുമാണ് പ്രതിപക്ഷ നേതാവ് വി.ഡി.സതീശൻ പ്രതികരിച്ചത്.
നെഗറ്റീവായി ഒന്നും സംഭവിക്കില്ല. ചര്ച്ച പോസീറ്റീവ് ആയിരുന്നെന്ന് ലീഗ് നേതാക്കള് തന്നെ വ്യക്തമാക്കിയിട്ടുണ്ടെന്നും സതീശൻ പറഞ്ഞു.