വി.ഡി. സതീശനെ പത്തനംതിട്ടയിലേക്ക് സ്വാഗതംചെയ്ത് എസ്എഫ്ഐയുടെ പരിഹാസ ഫ്ലക്സ്
Saturday, February 24, 2024 6:07 PM IST
പത്തനംതിട്ട: കെപിസിസിയുടെ സമരാഗ്നിക്കായി പത്തനംതിട്ടയിലെത്തുന്ന പ്രതിപക്ഷ നേതാവ് വി.ഡി. സതീശനെതിരേ എസ്എഫ്ഐയുടെ പരിഹാസ ബോർഡ്. സതീശന് പത്തനംതിട്ടയിലേക്ക് സ്വാഗതം എന്ന വാചകത്തിനൊപ്പം അസഭ്യ വാക്കും ചേർത്താണ് ഫ്ലക്സ് പ്രത്യക്ഷപ്പെട്ടത്.
പത്തനംതിട്ട നഗരത്തിലായി സ്ഥാപിച്ച ബോർഡിൽ എസ്എഫ്ഐ ജില്ലാ കമ്മിറ്റിയുടേതാണ് ബോർഡെന്ന് വ്യക്തമാക്കിയിട്ടുണ്ട്. സംഭവം ശ്രദ്ധയിൽപ്പെട്ടതോടെ യൂത്ത് കോൺഗ്രസ് പ്രവർത്തകർ എത്തി ബോർഡ് തകർത്തു.
വൈകിട്ട് പത്തനംതിട്ടയിൽ സമരാഗ്നി നടക്കാനിരിക്കെയാണ് എസ്എഫ്ഐ ഫ്ലക്സ് സ്ഥാപിച്ചത്. ആലപ്പുഴയിൽവച്ച് കെപിസിസി പ്രസിഡന്റ് കെ. സുധാകരൻ നടത്തിയ അസഭ്യ പ്രയോഗത്തിന്റെ ചുവടുപിടിച്ചാണ് എസ്എഫ്ഐയുടെ പരിഹാസം.