വാര്ത്താസമ്മേളനത്തിന് എത്താന് വൈകി പ്രതിപക്ഷ നേതാവ്; അസഭ്യപദം പറഞ്ഞ് കെപിസിസി പ്രസിഡന്റ്
Saturday, February 24, 2024 12:46 PM IST
ആലപ്പുഴ: പ്രതിപക്ഷ നേതാവ് ആലപ്പുഴയിലെ വാര്ത്താസമ്മേളനത്തിന് എത്താന് വൈകിയതിലുള്ള നീരസം പരസ്യമാക്കി കെപിസിസി പ്രസിഡന്റ് കെ.സുധാകരന്. മാധ്യമപ്രവര്ത്തകരെ വിളിച്ചുവരുത്തിയിട്ട് പ്രതിപക്ഷ നേതാവ് എവിടെപ്പോയെന്ന് സുധാകരന് ചോദിച്ചു.
ഇയാളെവിടെപ്പോയെന്ന് ചോദിച്ച സുധാകരൻ മാധ്യമങ്ങൾക്ക് മുന്നിൽവച്ച് അസഭ്യവാക്കും പറഞ്ഞു. പിന്നീട് ചാനല് മൈക്കുകളും കാമറകളും ഓണാണെന്ന് പറഞ്ഞ് ഒപ്പമുണ്ടായിരുന്നവര് സുധാകരനെ കൂടുതല് സംസാരിക്കുന്നതില്നിന്ന് തടയുകയായിരുന്നു.സമരാഗ്നിയുടെ ഭാഗമായുള്ള വാര്ത്താസമ്മേളനം ആരംഭിക്കുന്നതിന് തൊട്ടുമുമ്പായിരുന്നു സംഭവം.
രാവിലെ പത്തിനായിരുന്നു വാര്ത്താസമ്മേളനം നിശ്ചയിച്ചിരുന്നത്. എന്നാല് പത്തരയോടെയാണ് സുധാകരന് എത്തിയത്. പിന്നീട് 10:50 വരെ സതീശന് എത്താന് വേണ്ടി കാത്തിരുന്നു. ഈ സമയത്താണ് കാമറ മൈക്കുകള്ക്ക് മുന്നില് സുധാകരന് ക്ഷുഭിതനായത്.
പിന്നീട് 11ഓടെയാണ് സതീശന് എത്തിയത്. 11:05നാണ് പത്രസമ്മേളനം നിശ്ചയിച്ചിരുന്നതെന്ന് പറഞ്ഞ് സതീശന് പ്രശ്നം അവസാനിപ്പിക്കുകയായിരുന്നു. ചെസ് ടൂര്ണമെന്റുമായി ബന്ധപ്പെട്ട് വെഎംസിഎയില് നടക്കുന്ന പരിപാടിയില് പങ്കെടുക്കാന് പോയ സതീശന് മടങ്ങിയെത്താന് വൈകുകയായിരുന്നു.