ഗുൽമാർഗിൽ ഹിമപാതം: റഷ്യൻ പൗരൻ മരിച്ചു
Friday, February 23, 2024 7:17 AM IST
ശ്രീനഗർ: ജമ്മു കാഷ്മീരിലെ ഗുൽമാർഗിലുണ്ടായ ഹിമപാതത്തിൽ റഷ്യൻ പൗരൻ മരിച്ചു. റഷ്യയിൽനിന്നുള്ള ഏഴ് സ്കീയർമാരാണ് അപകടത്തിൽപെട്ടത്. ഇതിൽ ആറ് പേരെ രക്ഷപ്പെടുത്തി.
അഫർവത് പ്രദേശത്തെ ഖിലൻ മാർഗിൽ ഉച്ചയ്ക്ക് രണ്ടോടെയാണ് ഹിമപാതമുണ്ടായത്. ഏഴംഗ റഷ്യൻ സംഘം ഗൈഡിനൊപ്പം സ്കീയിംഗ് അനുമതിയില്ലാത്ത ആർമി റിഡ്ജ് പ്രദേശത്ത് എത്തുകയായിരുന്നു.
ഇത് ഹിമപാത സാധ്യത പ്രദേശമാണ്. ഇവിടെ ഹിമപാതമുണ്ടാകുമെന്ന് മുന്നറിയിപ്പുമുണ്ടായിരുന്നു. ഇത് ടൂറിസ്റ്റുകൾ അവഗണിക്കുകയായിരുന്നു.
മോസ്കോയിൽനിന്നുള്ള ഹാന്റൺ ആണ് മരിച്ചത്. മൃതദേഹം പോസ്റ്റ്മോർട്ടത്തിനായി സബ് ജില്ല ആശുപത്രിയിലേക്ക് മാറ്റി.