കെഎസ്ആർടിസി ബസും ബൈക്കും കൂട്ടിയിടിച്ച് പ്ലസ് ടു വിദ്യാർഥികൾ മരിച്ചു
Wednesday, February 21, 2024 10:50 PM IST
കൊല്ലം: കെഎസ്ആർടിസി ബസും ബൈക്കും കൂട്ടിയിടിച്ച് പ്ലസ് ടു വിദ്യാർഥികൾ മരിച്ചു. കൊല്ലം ആശ്രാമത്തിനടുത്ത് ബുധനാഴ്ച വൈകിട്ട് മൂന്നിനാണ് സംഭവം. അഞ്ചുകല്ലുംമൂട് സ്വദേശി ജി.സജിയുടെ മകൻ ആൽസൺ എസ്.വർഗീസ്, വടക്കുംഭാഗം ബംഗ്ളാവ് പുരയിടം സേവ്യറിന്റെ മകൻ അലൻ സേവ്യർ എന്നിവരാണ് മരിച്ചത്.
കൊല്ലം ക്രിസ്തുരാജ് ഹയർസെക്കൻഡറി സ്കൂൾവിദ്യാർഥികളാണ് ഇരുവരും. ഹയർസെക്കൻഡറി മോഡൽ പരീക്ഷയ്ക്ക് ശേഷം സുഹൃത്തിന്റെ ജന്മദിനാഘോഷത്തിൽ പങ്കെടുക്കാനായി ബൈക്കുമായാണ് ഇവർ പോയത്.
തുടർന്ന് തിരികെ വരും വഴി കെഎസ്ആർടിസി തെങ്കാശി ഫാസ്റ്റ് പാസഞ്ചർ ബസിൽ അമിതവേഗത്തിൽ വന്ന ഇവരുടെ ബൈക്ക് ഇടിച്ചുകയറിയാണ് അപകടമുണ്ടായത്. ആൽസൺ അപകടസ്ഥലത്ത് തന്നെ മരിച്ചു. അലനെ ഗുരുതര പരിക്കുകളോടെ കൊല്ലത്തെ സ്വകാര്യ ആശുപത്രിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ പോലീസ് കേസെടുത്തതായി അറിയിച്ചു.