തൃപ്പൂണിത്തുറ സ്ഫോടനം; പടക്കം സംഭരിച്ചത് അനുമതിയില്ലാതെ
Monday, February 12, 2024 12:54 PM IST
കൊച്ചി: തൃപ്പൂണിത്തുറയില് ക്ഷേത്രത്തിലെ ഉത്സവത്തോടനുബന്ധിച്ച് പടക്കം സംഭരിച്ചത് യാതൊരു അനുമതിയുമില്ലാതെ. കരിമരുന്ന് ഇറക്കാന് അപേക്ഷ പോലും നല്കിയിട്ടില്ലെന്ന് ജില്ലാ കളക്ടര് എന്.എസ്.കെ. ഉമേഷ് പ്രതികരിച്ചു.
പുതിയകാവ് ക്ഷേത്രത്തിലെ ഉത്സവത്തോടനുബന്ധിച്ച് വടക്കുംപുറം കരയോഗക്കാർ പടക്കം സംഭരിച്ചിരുന്ന സ്ഥലത്താണ് സ്ഫോടനമുണ്ടായത്. ഇവിടെ സ്ഫോടകവസ്തുക്കള് സംഭരിക്കാന് അനുമതി നല്കിയിരുന്നില്ലെന്ന് ഫയര്ഫോഴ്സ് വ്യക്തമാക്കി.
വെടിക്കെട്ട് നടത്താനും അനുമതി ഇല്ലായിരുന്നെന്ന് പോലീസ് അറിയിച്ചു. ഇവിടെ ഞായറാഴ്ച തെക്കുംപുറം വിഭാഗത്തിന്റെ വെടിക്കെട്ട് നടന്നത് അനുമതി ഇല്ലാതെയാണ്. ഇതിന് ഇവര്ക്കെതിരേ പോലീസ് കേസെടുത്തിരുന്നു.
തൃപ്പൂണിത്തുറ ചൂരക്കാടാണ് സ്ഫോടനമുണ്ടായത്. വാഹനത്തില് നിന്ന് കരിമരുന്നുകള് ഇറക്കുന്നതിനിടെ പൊട്ടിത്തെറി ഉണ്ടാവുകയായിരുന്നു.
അപകടത്തിൽ ഒരാൾ മരിച്ചു. 15 പേർ പരിക്കേറ്റ് ചികിത്സയിലാണ്. ഇതിൽ ഒരാളുടെ നില ഗുരുതരമായി തുടരുകയാണ്.
സ്ഫോടകവസ്തുക്കളുടെ അവശിഷ്ടങ്ങൾ അരകിലോമീറ്റർ അകലെ വരെ തെറിച്ചു. സ്ഥലത്തെ ഇരുപതോളം വീടുകള്ക്ക് കേടുപാടുകള് സംഭവിച്ചിട്ടുണ്ട്. ഇരുനില വീടുകളുടെ കോൺക്രീറ്റും ജനൽപാളികളും അടർന്നുവീണ നിലയിലാണ്.