നരഭോജിക്കടുവയെ പിടികൂടണം: പ്രജീഷിന്റെ മൃതദേഹം ഏറ്റുവാങ്ങാതെ ബന്ധുക്കളുടെ പ്രതിഷേധം
Sunday, December 10, 2023 1:36 PM IST
കൽപറ്റ: വയനാട് സുൽത്താൻ ബത്തേരി വാകേരിയിൽ കടുവയുടെ ആക്രമണത്തിൽ കൊല്ലപ്പെട്ട പ്രജീഷിന്റെ പോസ്റ്റുമോർട്ടം നടപടികൾ പൂർത്തിയായി. എന്നാൽ മൃതദേഹം ഏറ്റുവാങ്ങാൻ ബന്ധുക്കൾ തയാറായില്ല.
കടുവയെ പിടികൂടാനുള്ള ഉത്തരവ് ഇറങ്ങാതെ മൃതദേഹം ഏറ്റുവാങ്ങില്ലെന്ന നിലപാടിലാണ് നാട്ടുകാരും ബന്ധുക്കളും. ഈ ആവശ്യവുമായി ബന്ധുക്കളും നാട്ടുകാരും സുഹൃത്തുക്കളും താലൂക്ക് ആശുപത്രി മോർച്ചറിക്ക് മുമ്പിൽ പ്രതിഷേധിക്കുകയാണ്.
അതേസമയം, കടുവയെ പിടികൂടാൻ കാൽപ്പാടുകൾ നോക്കി തിരച്ചിൽ നടത്തുകയാണ് വനംവകുപ്പ്. നിരീക്ഷണത്തിനായി ശനിയാഴ്ച സ്ഥാപിച്ച കാമറയിൽ കടുവയുടെ ദൃശ്യങ്ങൾ പതിഞ്ഞിട്ടുണ്ട്. പ്രജീഷ് കൊല്ലപ്പെട്ട സ്ഥലത്ത് കടുവ വീണ്ടും എത്തിയതായാണ് വനംവകുപ്പ് കണക്കുകൂട്ടുന്നത്. ഇന്ന് രാവിലെ പ്രദേശത്ത് കണ്ട കാൽപ്പാടുകൾ കടുവയുടേതെന്ന് സ്ഥിരീകരിച്ചു.
കടുവയെ പിടികൂടണമെന്നാവശ്യപ്പെട്ട് ശനിയാഴ്ച പ്രദേശത്ത് നാട്ടുകാർ പ്രതിഷേധിച്ചിരുന്നു. പാതി ഭക്ഷിച്ച നിലയില് മൃതദേഹം കണ്ടെത്തിയതിനാല് തന്നെ പ്രദേശത്ത് ജനങ്ങള് വലിയ ഭീതിയിലാണ്.
സൗത്ത് വയനാട് വനം ഡിവിഷനിലെ ചെതലത്ത് റേഞ്ച് പരിധിയിലെ വാകേരി മൂടക്കൊല്ലി കൂടല്ലൂരിൽ ശനിയാഴ്ച രാവിലെ 11 മണിയോടെയാണ് സംഭവം. രാവിലെ പുല്ലരിയാൻ പോയ പ്രജീഷ് ഉച്ചകഴിഞ്ഞും തിരിച്ചെത്താതായതോടെ ജ്യേഷ്ഠൻ മജീഷ് അന്വേഷിച്ചെത്തിയപ്പോഴാണ് ദാരുണരംഗം കണ്ടത്.
ഇടതുകാൽമുട്ടിനു മുകളിലുള്ള ഭാഗം വന്യജീവി ഭക്ഷിച്ച നിലയിലായിരുന്നു മൃതദേഹം. ശിരസിലും കടിയേറ്റ അടയാളമുണ്ട്. പ്രജീഷിനെ കൊന്നത് കടുവയാണെന്ന് കാൽപ്പാടുകൾ പരിശോധിച്ച് വനംവകുപ്പ് ഉദ്യോഗസ്ഥർ സ്ഥിരീകരിച്ചു.
വീടിന് ഏകദേശം അര കിലോമീറ്റർ അകലെ സ്വകാര്യ തോട്ടത്തിലാണ് പ്രജീഷ് പുല്ലരിയാൻ പോയത്. ജീപ്പ് വഴിയിൽ നിർത്തിയാണ് തോട്ടത്തിൽ കയറിയത്. പുല്ലരിഞ്ഞ ഭാഗത്തുനിന്നു കുറച്ചു മാറി ചതുപ്പിനു സമാനമായ സ്ഥലത്താണ് മൃതദേഹം ഉണ്ടായിരുന്നത്.
മൃതദേഹം നീക്കം ചെയ്യാൻ രാത്രി വൈകിയും ഉദ്യോഗസ്ഥരെ പ്രദേശവാസികൾ അനുവദിച്ചിരുന്നില്ല. പ്രജീഷിന്റെ കുടുംബത്തിനു നഷ്ടപരിഹാരം പ്രഖ്യാപിക്കുക, കടുവയെ വെടിവച്ചു കൊല്ലുക, മൂടക്കൊല്ലി വനാതിർത്തിയിൽ മൂന്നു കിലോമീറ്റർ ഫെൻസിംഗ് അടിയന്തരമായി സ്ഥാപിക്കുക എന്നീ ആവശ്യങ്ങളിൽ തീരുമാനമാകാതെ മൃതദേഹം നീക്കം ചെയ്യാൻ സമ്മതിക്കില്ലെന്ന നിലപാടിലായിരുന്നു ജനക്കൂട്ടം.
ഐ.സി. ബാലകൃഷ്ണൻ എംഎൽഎ, പൂതാടി പഞ്ചായത്ത് പ്രസിഡന്റ് മിനി പ്രകാശ് എന്നിവരടക്കം ജനപ്രതിനിധികളുമായി വനം ഉദ്യോഗസ്ഥർ നടത്തിയ ചർച്ചയ്ക്കൊടുവിൽ രാത്രി ഒന്പതോടെയാണ് മൃതദേഹം ബത്തേരി താലൂക്ക് ആശുപത്രി മോർച്ചറിയിലേക്ക് കൊണ്ടുപോയത്.
കുട്ടപ്പൻ-ശാരദ ദന്പതികളുടെ മകനാണ് അവിവാഹിതനായ പ്രജീഷ്. ജിഷ സഹോദരിയാണ്.കടുവയെ വെടിവച്ചു കൊല്ലാനുള്ള ഉത്തരവിന് മുഖ്യ വനപാലകന് ശിപാർശ അയച്ചതായി ഡിഎഫ്ഒ ജനപ്രതിനിധികളെ അറിയിച്ചു.
10 ലക്ഷം രൂപ നഷ്ടപരിഹാരത്തിൽ അഞ്ചു ലക്ഷം രൂപ തിങ്കളാഴ്ച കൈമാറും. വനാതിർത്തിയിൽ തൂക്കുവേലി നിർമിക്കും. പ്രദേശത്തെ തോട്ടങ്ങളിലെ കാട് വെട്ടിനീക്കുന്നതിന് റവന്യു അധികാരികൾ മുഖേന ഉടമകൾക്ക് നിർദേശം നൽകുമെന്നും ചർച്ചയിൽ ഡിഎഫ്ഒ വ്യക്തമാക്കി.